1 желтоқсан күні, Әулиекөл аудандық мәдениет үйінде, Батырбек Жүнісов атындағы «Жетікөл» халық ұлт аспаптар оркестрінің құрылғанына 45 жыл және осы оркестрдің негізін қалаушы, Қазақ өнерін қастерлеген жерлесіміз Жүнісов Батырбек Жүнісұлын еске алуға арналған әуезді кеш өтті.
Сахнада сөз алғандар марқұмның кісілік болмысы мен ұйымдастырушылық, өнерпаздық шеберлігін тебірене еске алып, артына өшпес із қалдырған аяулы азаматтың рухына тағзым етті.
Аталмыш оркестр 1977 жылдың қыркүйек айында құрылды. Оны құрудағы басты мақсат – халқымыздың әкеден – балаға, ағадан – ініге етенеден бойға сіңген өнер дәстүрін бүгінгі ұрпаққа кеңінен таратып таныстыру. Шақырылған қонақтар арасында ең алғашқы ансамблдің қатысушылары да келді. Бар ғұмырын музыкаға арнаған Батырбек Жүнісовтың есімі өзі құрған «Жетікөл» окестріне берілді. 
Шара барысында,  Батырбек Жүнісов атындағы «Жетікөл» халық  ұлт аспаптарының 45 жылдық мерейтойына орай оркестр ұжымы аудан әкімінің мадақтамасымен марапатталды.
Әуезді кеште, «Жетікөл» халық ұлт аспаптар оркестрі, «Қазына этно-фольклорлық ансамблі», Ерлан Қасымов, Арстанбек Бірмағанбетов, «Элина» би тобы, Нұржан Қуандықов және Рахат Жайсанов өнер көрсетті.