Ол - туған жеріне туын тіккен азамат.
Әкесінің тәлімін алып, сара жолды жалғай түскен өнерпаз.
Ұлттық өнердің жаңа дәуірдегі жанашыры - Хамзина Гүлзат Болатқызы.
- Гүлзат ханым, сұхбатымыздың біссімілләсын, өнер жолына қалай келдіңіз деген сауалдан бастасақ?
- Өнер дегеніміз әркімнің уысына оңайлықпен түсе бермейтін, Алланың қалауымен берілетін ерекше дарын деп түсінемін. Сонымен қатар, өнер әкенің қанымен, ананың сүтімен берілетін ғажап бір дүние десек те болады. Менің өнерге келуім туған бетте маңдайыма жазылып қойған тағдырым деп айтсам, артық кетпеген болармын. Әкем Болат Хамзаұлы осы Торғай өңіріне белгілі сазгер, өнер адамы болғандықтан, кішкентайымыздан музыка әлеміне етене жақын болдық. Болашақ мамандығымның қандай болатынын әуел бастан шешіп қойған едім десем де болады.
- Мәдениет үйінің тізгінін ұстау несімен қиын? Қалжыраған сәттеріңізде не шабыттандырады?
- Қай саланың болмасын тізгінін ұстап тұрған адамның алдында қиындық пен кейде бір шешілмейтіндей көрінетін кедергілер, сынақтар жиі кездесіп тұрады. Өнер саласында да жүрекпен, ақылмен шешілетін мәселелер өте көп болады. Ең бастысы, істеп жүрген ісіңе шынайы махаббапен қарау керек сияқты. Тек сонда ғана ешқандай да қиындық пен кедергі жолыңды бөгемейді деп ойлаймын. Бір сөзбен айтқанда, өз ісіңнің шынайы жанашыр маманы болу керексің. Мен өнерді сүйемін. Қазақтың өнерін дамыту жолында еш қалжырамаймын.
- Кімнен үлгі аласыз?
-Әр пенденің қамшының сабындай қысқа өмірінде кездесетін үлгі аларлық адамдары көп болса, ол асқан бақыт шығар. Үлгі тұтарлық адамдарым, Аллаға шүкір, жеткілікті деуге болады. Алайда, ең басты, үлгі тұтар тұлғам ол - өз әкем, Болат Хамзаұлы. Туған еліне кіршіксіз еңбек сіңіріп, өле-өлгенше «Торғайым!» деп өтті әкем.Туған топырағын сүйіп өткен адам - нағыз үлгі аларлық тұлға деп ойлаймын.
- Қазіргі уақытта: «Ой, бұрынғының өнерпаздары мен қазіргілерді мүлдем салыстыруға келмейді. Бұрынырақта барлығы жанды дауыспен орындаушы еді, бүгінде басым көпшілігі жасанды жазбамен ән шырқауға көшіп алған...», - деген секілді пікірлерді жиі естіп жатамыз. Мұндай топшылауға не айтар едіңіз?
- Өнер бір орында тұрмайды. Дамиды, өзгереді, трансформацияланады. Ғасырдан артық уақыт бұрын адам баласы дауысты таспаға жазу дегенді тіпті білмеуші де еді. Ал қазіргі таңда адамзат технологиялардың небір жетістіктеріне жетіп жатыр. Жасанды жазбамен айтылған әнді балағатаушылардың қатарына өзімді жатқыза алмаймын.Шын дарын өзінің таланты мен шынайы өнерін әр уақытта да көрсете алады. Әрине, жанды дауыс әрдайым үлкен сұраныста болады. Оған өзіміздің біртуар дарынымыз Димаш Құдайбергенов баламыз дәлел емес пе?!
- Жангелдин ауданы облыс орталығынан біраз қашықта жатыр. Бұл географиялық орналасу аудандық мәдениет үйінің дамуына, әлдебір мақсаттарына қол жеткізуіне кедергі келтірмейді ме?
-Кедергі келтіреді. Көптеген қиындықтар алдан шығып жатады. Алайда, әлгінде айтып кеткендей, шын өнер мен дарын қара тасты тесіп шыққан көк шөптей емес пе?! Тұмшалап жауып қойсаң да, үні жарып шығады! Қашан да, солай болған. Тек сол өнерді қолдап, шын жанашыр болатын азаматтар көбейсе екен деген арман қашан да жүректе жалындап тұрады.
- Кейінге шегініс жасасақ. Мектептен түлеп ұшқан бойжеткен Гүлзат не жайында армандап, қиялдап еді? Сол армандардың бір сыпырасы болсын орындалды ма?
- Ол кезде Кеңес үкіметі заманы еді ғой. Мектепті бітіре салысымен, Қостанайдың Мәдени ағарту училищесін оқып тәмамададым. Елге келіп, бірден осы мәдениет үйіне жұмысқа тұрып, біраз жылдар бойы сахна әртісі болып еңбек еттім. Сол жылдар ішінде талай іс сапар, гастрольдермен шетелдерге де барып келдім. Қарапайым сөзбен айтқанда, армандап та үлгерместен біраз жетістікке жетіп, алар асуларымды алдым деуге болатын шығар. Өткенге қарап, жасаған таңдауыма өкінбеймін десем де болады.
- Осы қызмет жолыңызда өз басыңызға риза болып, әрі тамсанатын басты мақтанышыңыз және ең үлкен өкінішіңіз бар ма?
- Қызмет жолыма сөзсіз ризамын! Жоғарыда айтылғанның барлығы бұл сөзіме дәлел. Болашақта тынымсыз еңбек етіп, талай жетістіктерге жетеміз деген үміттемін. Өкініш жоқ. Өкпемен өмір сүреін адамдардың қатарында емеспін.
- Шығармашылық ұжымдарыңыздағы маман жағы қалай, жеткілікті ме? Алдыңғы лек пен кейінгі буынның арасында сабақтастық, былайша айтқанда, байланыс бар ма?
- Мамандар жетіспеушілігі мәселесі тек Торғай өңірінде ғана емес, жалпы Қазақстан аумаындағы барлық аймақтарға қатысты жайт.. Қай салада болмасын мамандар тапшы. Бізге де, өнер саласының білікті мамандары ауадай қажет. Жаңа толқын керек. Ал алдыңғы буын өнер тарландарымен үнемі байаныстамыз. Біліктілікпен алмасу, шеберлік сабаеғы деген іс-шаралар әрдайым өтіп тұрады. Тарихты, өткенді өшіріп тастау мүмкін емес. Ол - біздің фундамент.
- Қоғам пікіріне құлақ асатын ұлттанбыз ғой, бәлікім, «халық айтса, қалып айтпайды» дегеннен болар. Бүгінде, әнші, асаба аядай ғана Қостанайдың өзінде көбейіп кеткен сыңайлы. Көбіне, сапалары сын көтермей жатады. Бұл неден деп ойлайсыз?
- Өте жақсы сұрақ. Бұл мәселе ел арасында жауыр болған жағдай. « «Әу!» дегеннің бәрі -әнші, бәрі –сал» деген пікірмен келіспеймін. Той басқарып, елді ауызына қарату әрбір адамның қолынан келе бермейді. Ол үшін бойда туа біткен шын дарын болу керек. Профессионаллизм деген бірінші орында болса, ләзім. Не болмаса, сонау ата-бабамыз - Ақан сері, Біржан Салдай аузын ашса, көмекекейі көрінетін тума талант болуы керек. Өнер саласына үлкен реформа қажет. Тойдың асабасы мен әншілеріне қойылатын заңды талаптар мен ережеер болу керек сяқты.
- Білдей бір ұжымның тізгінін ұстаған кісі ретінде, өскелең ұрпақтың қандай мамандықтарды меңгергенін қалар едіңіз?
- Белгілі өлең шумақтарындағы : «Все профеессии нужны, Все профессии важны!» - демекші. Қазақ еліне қай мамандық иесі болса да қажет. Ең бастысы, сол мамандықты жақсы меңгерген білікті маман болуы маңызды шығар.
Блиц
1. Өнер жолындағы алғашқы ұстазыңыз?
- Әкем.
2. Қазіргі жастар міндетті түрде оқуы тиіс бес авторды атасаңыз? (Қай елдің қаламгері екеніне шектеу жоқ)
Абай, М.Әуезов, Ш.Айтматов, А.Пушкин, М.Булгаков.
3. Әлеуметтік желі – адамзат баласының жетістігі ме, зауалы ма?
Жетістігі.
4. Қолыңыз қалт еткенде ермек қылатын сүйікті ісіңіз (хобби) бар ма?
- Қазақтың қолөнер бұйымдарын жинаймын.
5. Өмірлік ұстанымыңыз қандай?
Мойыма! Тек Алға!!!
