Садықовтар отбасының қызықты да, қилы тағдыры кино саласының мамандарын да бей жай қалдырмай, әр басылымдағы жазбаларды жинақтап, кейіпкерлермен кездесіп, шынайы оқиғаға құрылған 15 сериялы «Бозторғай» телехикаясы былтыр түсірілген еді.
Бұл телехикая көрермендер арасында қызығушылық тудырды. Енді осы фильмнің жалғасы Қостанай, Арқалық қалаларында жалғасып, түсірілім жұмыстары басталмақ. Оған облыстық әкімдік, облыстық мәдениет басқармасы қолдау бірдіріп отыр.
Осыған байланысты режиссер, продюсер, актер Жалын Тілеуберген облыстық халық шығармашылығы орталығының басшысы Д.Қалқаевпен бірге облыстық қазақ драма театрының әртістерімен кездесіп, кастинг жайын талқылап, кино түсіруге қолайлы деген қаланың, Қостанай ауданының біраз жерлерін аралады. Тұрғындармен кездесіп, кино түсіру барысын түсіндірді. Сюжетке қажетті деген дүниелерді, ғимараттарды қарады. Фильм түсіруге кастинг жарияланды. Оған үміткерлер қатысып, бақ сынай алады. Осы орайда продюсер, актер Жалын Тілеубергенге бірер сұрақ қойған едік.
– Бір отбасын негізге ала отырып, фильм түсірудегі мақсат не?
– Фильмнің екінші маусымын Қостанай, Арқалық қалаларында түсіргіміз келеді. Сериал нарық жылдарындағы бір отбасының жағдайы туралы болды. Әу бастағы мақсатымыз бала асырауға қадам жасай алмай жүрген ата-аналарға немесе өзінің баласынан бас тартып жатқан ата-аналарға ой салсақ деген едік. Сонымен қатар сол кезеңдегі қиындықты көрсетсек дедік. Он баланы асырап алған Нұрлан мен Қарлығаның өмірін негізге ала отырып, әлеуметтік проблеманы да көрсеттік. Көрермен тарапынан қолдауға ие болды.
– Сериалдың жалғасы не туралы болмақ?
– Ендігі екінші маусымда сол асырап алған балалардың ендігі тағдыры, өмір жолдары жөнінде болмақ. Бекон атты кейіпкерімізге назар аударып, сюжетті аша түспекпіз. Беконның өмірінің жалғасы осы жолы көрсетіледі.
– Түсірілім жұмыстары қашан басталмақ?
– Түсірілім алаңы ретінде Қостанай қаласы, Заречный, Тобыл өңірі және Арқалық қаласын таңдап алып отырмыз. Осы мақсатта біраз үйлерді, алаңдарды аралап көріп шықтық. Бізді қарсы алып жатқан облыстық мәдениет басқармасына алғысым шексіз. Қолдау біліріп жатыр. Кастинг те жарияладық. Кездесулер өткізіп те үлгердік. Келер айда Алматыдан түсірілім тобы келеді. Осы қалада фильм түсіріп жатқан алғашқы компаниялардың біріміз десек те болар.
