ӘРІПТЕСТЕРГЕ МӘДЕНИЕТ ҚЫЗМЕТКЕРЛЕРІ КҮНІНЕ АҚ ТІЛЕК — МҰХАМЕДИЯ ТОЛҒАНАЙ РАМАЗАНҚЫЗЫ, Амангелді ауданы, Үрпек ауылдық клубының әдіскері: ШЫҒАРМАШЫЛЫҚ ШАБЫТПЕН ЖҰМЫС АТҚАРАМЫЗ

МӘДЕНИЕТ САЛАСЫНА ҚАЛАЙ КЕЛДІҢІЗ?

— Мәдениетке келуім өзім таңдаған мамандығыма байланысты деп ойлаймын. Өзім Қазақ агротехникалық университетінің мәдени сервис мамандығын тәмамдадым. Отбасын құрып, Үрпек ауылына келіп, ауылдық клубтың әдіскері болып жұмыс жасаймын. Аудандық байқаулардан ауыл өнерпаздары жүлделі орындар иеленіп, 2022 жыл қортындысы бойынша "Үздік ауылдық клуб" номинациясын иелендік.

БИЫЛҒЫ ЖЫЛ ШЫҒАРМАШЫЛЫҚ ЖАҒЫНАН НЕСІМЕН ЕРЕКШЕ?

— Биылғы жыл жалпы, біздің аудан үшін ерекше, себебі, мерейтойға толы жыл. Ұлт азаттық көтерілісінің сардары, халық батыры Амангелді Имановтың 150 жылдығы, ауданымызға 95 жыл, ҚР Халық әртісі, кино және театр актері Әнуар Боранбаевтың туғанына 75 жыл, журналист, ақын марқұм Хамитбек Мұсабаевқа және әнші-композитор Қалибек Деріпсалдинге 70 жыл. Міне, осы айтулы мерейтойларға түрлі іс-шаралар жоспарланып отыр. 1000 домбырашы, сахналық қойылымдар, концерттер, тақырыптық көрмелер ұйымдастырылады. Осыған шығармашылық шабытпен жұмыс жасаймыз. Атқарылған жұмыс та аз емес. Ауыл тұрғындарымен тығыз байланыста жемісті еңбек етіп келемін.

МЕРЕКЕ ҚАРСАҢЫНДА ӘРІПТЕСТЕРІҢІЗГЕ ТІЛЕК ЖОЛДАСАҢЫЗ

— 21 Мамыр — Мәдениет және өнер қызметкерлері күні қарсаңында барша әріптестеріме шығармашылық шабыт, ізденіс, жаңа жобаларды жүзеге асыруда қажымас қайрат тілеймін!