Ақтау қаласында өткен республикалық «Дарындар әлемі» байқау-фестиваліне біздің өңірден де өнерпаздар қатысып, жетігенші Гүлбахар Назар бірінші орын алып, күні кеше Қостанайға келді.
Ақтау қаласында «Daryn» продюссерлік орталығы ұйымдастыруымен алғаш өтіп отырған байқау жас дарындарды қолдауға арналған. Біздің өңірден «Айсұлтан» өнер мектебінің шәкірттері мен жас жетігенші Гүлбахар Назар аттанған еді. Гүлбахар орта топта «Жетіген» номинациясы бойынша бірінші орынды иеленді. Гүлбахардың жетекшісі өзінің анасы – Мөлдір Құлымбетова.
– Мөлдір, жеңіс құтты болсын. Байқаудың деңгейі қандай болды, не үйреніп, не түйіп қайттыңыздар?
– Байқауға еліміздің әр өңірінен Ақтөбе, Алматы Атырау, Қостанай, Ақтаудан барлығы 62 үміткер қатысты. Біздің өңір де тыс қалмады. Гүлбахардың баруына облыстық көркемөнерпаздардың халық шығармашылығы мен кинобейнеқор орталығы демеуші болып, орталықтың халық бөлімінің жетекшісі Гүлнар Молдашева өзі бас болып, алып барған еді. Алғысым шексіз. Осы үмітті ақтап, жеңіспен оралдық. Тәжірибе алмасып, жетігенші Нұргүл Жақыпбектің шеберлік сағатына қатыстық. Балалар көп дүниені үйренді. Жалпы басқа ортаны көріп, өзге қалаға барып, байқауға қатысып тұрған дұрыс. Бұл балаға шабыт беріп, дүниетанымын кеңейтеді.
– Ендігі жоспарларыңыз қандай?
– Осы жолы Стамбул қаласына жолдама алып, бізге 70 пайыздық жеңілдік берілді. Алдағы 8 қаңтарда халықаралық деңгейдегі «Дарындар әлемі» конкурс-фестивалі өтеді. Уақыт тығыз болса да дайындаламыз. Шет елге шығып, ол жақтың да деңгейін көргіміз келеді. Қызым бар болғаны 10 жаста болса да қазақтың өнерін дамытуға барын салып, ынталанып жүр. Осындай өнерпаздардың қолдау тауып жүргені қуантады.
– Әңгімеңізге рахмет, сәттілік тілеймін. Жеңісті күндерде жүздесейік.
Жүлделі оралған жетігенші Гүлбахар Назар мен «Айсұлтан» өнер мектебінің шәкірттерін құттықтап, өнерді дамытуға қосқан үлестері үшін айтар алғысымыз мол.
