Бүгін – Көрісу күні. Наурыз тойының бастауы саналатын бұл ата дәстүрді "Амал мерекесі" деп те атайды. Алты ай қыстан аман шығып, жаймашуақ көктеммен есен-сау қауышқан қауым бір-бірінің шаңырағына бас сұғып, сәлем сұрасып, төс қағыстырып, жаңа жылмен құттықтасады.
Батыс өңірлеріне сіңісті болып кеткен бұл мейрам соңғы жылдары елдің әр түкпіріне кең тарай бастады. Тобыл-Торғай жұртшылығы да Көрісу күнін ескерусіз қалдырмайды. Барынша шырайын келтіріп атап өтуге тырысатын ағайын қатары жылдан-жылға көбейіп келеді.
Бүгін өңірге танымал азаматтар осынау игі дәстүрдің жарқын үлгісін көрсетті. Танымал журналист, "Астана" телеарнасының Қостанай облысындағы тілшісі Заңғар Санай белгілі өнерпаз, дәстүрлі әнші, жыршы, облыстық "Қостанай таңы" газетінің тілшісі Қыдырбек Қиысханның шаңырағына көріскелі барып, аталы жолмен сәлем беріп, екі дос төс қағыстырды.
Ақ дастархан басында "Амал күні" жайлы дәмді де мәнді әңгіме-дүкен құрысты. Әуелете ән айтылған, сүбелі ойлар қозғалған, пайымды пікірлер ортаға салынған отырысқа сіздер де куә болғайсыздар!
