Бүгін "Шаңырақ" ұлттық өнер орталығында онлайн сұқбаттар легі жалғасын тапты. Бұл жолғы жүздесу Қарабалық ауданы Мәдениет үйінің басшысының міндетін атқарушы, әнші, термеші Қаныбек Әлимен өтті.
Құрметті мейман сұхбат барысында былтыр атқарылған жұмыстар мен осы жылға еншіленіп отырған жоспар-жобаларын тілге тиек етті. Атап айтқанда, "Рухани жаңғыру" бағдарламасы аясында өткізілген іс-шаралар, Тәуелсіздіктің 30 жылдығына арналып ұйымдастырылған байқаулар, алдағы мақсат-міндеттер, мереке-мерейтойларға дайындық барысы жайында әңгіме қозғалды.
Қаныбек Әли өткен жыл өзі үшін ерекше оқиғалармен есте қалғанын сөз етті. Өйткені кейіпкеріміз Тәуелсіздіктің төл құрдасы. Ел егемендігінің 30 жылдығымен қоса, орда бұзар жасқа толды. Өңірге белгілі өнерпаз өз ізденістері жөнінде де мәлімет берді. Ұжымды ұйыстырып, ұйымдастырудан бөлек, өзінің жеке шығармашылығын дамытуды да назардан тыс қалдырмауға тырысатынын айтады ол.
Алға қарай талпынудан, жеңіс үшін қам қылудан танбайтын талант иесіне шығармашылық табыс, қызметіне абырой тілейміз!
