Қостанай облыстық Ыбырай Алтынсарин мемориалдық музейінің басшысы, композитор, айтыскер ақын Марғұлан Бақытбекұлы Оспановпен сұхбат

— ӨЗІҢІЗДІ ТАНЫСТЫРЫП КЕТСЕҢІЗ?

— Мен — Оспанов Марғұлан Бақытбекұлы, 1986 жылдың 2 мамырында Қостанай облысы, Жангелдин ауданы, Шилі ауылда дүниеге келдім.

— ӨНЕРГЕ ҚАЛАЙ КЕЛДІҢІЗ?

— Мектеп жасымнан шығармашылыққа жақын болдым. Түрлі іс-шараларға, үйірмелерге белсене қатысып, әншілік, ақындық өнерімді шыңдадым. Алдымен мектепішілік, кейін аудандық, облыстық оқушылар айтысына қатысып, жүлделі орындар алып жүрдім. Жыр мүшәйраларына да жиі қатысып, жазған өлеңдерім газет-журнал беттерінде жарияланып жүрді. Домбыра, гармон тартып, мектеп сахнасынан түспедім.

— ҚАШАННАН БАСТАП ӘН ЖАЗА БАСТАДЫҢЫЗ, БІРІНШІ ШЫҚҚАН ӘНДЕРІҢІЗГЕ ТОҚТАЛЫП КЕТСЕҢІЗ?

— Оқушы кезімде өзім жазған өлеңдерімді кез-келген әнге салып орындап жүретінмін. Кейін өзім де ән жазсам ғой, шіркін, деп армандадым. Арманым мақсатқа ұласты. Мақсатым жүзеге асып, айтысқа өз мақамыммен шығып жүрдім. Студент кезімде алғаш рет «Ренжіме» деген өлеңіме ән жаздым. Оны Арқалықта Есен Жүсіпов деген оқушым музыкалық әрлеу жасатып, бірінші болып сахнаға шығарды. Бұл әнді кейін «АманStar» дуеті (ҚМУ студенттер) өздеріне лайықтап қайта жазды. Осылай алғашқы әнім жергілікті жас әншілер сұранысына ие болғасын менің де ән жазуға деген құмарлығымды арттырды. Кейін Абылай Маудановтың бірнеше өлеңіне ән жаздым.

— ҚАЗІРГІ ЖАҢА ШЫҒЫП ЖАТҚАН ӘНДЕРГЕ КӨҢІЛІҢІЗ ТОЛА МА?

— Менің жазған әндерім қазақылық болмысынан ажырамайды. Себебі өзім сүйіп тыңдайтын әндер де ұлттық бояуы бар қазақы әндер. Ал бүгінгі кейбір әншілер орындап жүрген иірімі икемге келмейтін, есіңді тандыратын есер әндер көңіліме жатпайды. Оларды екінші рет тыңдау мүмкін емес сияқты. Ал, хит болмаса да тыңдаушысын жоғалтпайтын өміршең әндер де көп. Кейде жаңадан шыққан жақсы әнді тыңдасам «осы әннің авторы мен неге болмадым, мен де осындай ән жазсам ғой» деген арман пайда болады. Кейін сондай стильде ән жазуды өзіме мақсат етемін. Бірақ мен көбіне өлеңнің сөзіне мән бергендіктен бірінші мәтінін таңдап, соған ән шығарамын.

— АЛДАҒЫ ШЫҒАРМАШЫЛЫҚ ЖОСПАРЫҢЫЗ?

— Қазақ эстрадасындағы танымал әншілердің талғамына лайық ән жазу, оны орындаушының шеберлігімен жалпы халықтың жүрегіне жеткізу, кейін есеп беру, шығармашылық концерттерімді Нұр-Сұлтан қаласында жоғары деңгейде ұйымдастыру басты мақсатым.