#Qazaqstan30
Дәнді өлкенің дарындарына – «Дегдар» қорынан домбыра. Тобыл қаласындағы «Алтын дән» МҮ қазақ этномәдениеті бірлестігінің жетекшісі Айнұр Сейітова Нұр-Сұлтан қаласында өткен рухани кешке қатысып, туған жерге сый-сияпатпен оралды. Осы қуанышқа орай Айнұр Тойлыбайқызына бірер сұрағымызды қойған едік.
— Айнұр ханым, елордаға жасаған рухани сапарыңыз туралы кеңірек баяндап берсеңіз?
— 2021 жылдың 26 қазанында Нұр-Сұлтан қаласындағы Жастар опера және балет театрында күйші, композитор Дина Нүрпейісованың 160 жылдығына орай іс-шара өткізілді. Бұл аталған іс-шараға ҚР Мәдениет және Спорт министрі Ақтоты Райымқұлова және «Дегдар» гуанитарлық қоры қамқоршылық кеңесінің төрайымы Дариға Назарбаева, ҚР «Күй анасы» қорының директоры, композитор, прфессор, Дина Нүрпейісованың шөбересі төлеген Қуанышов қатысты. Сондай-ақ, күйші, композитор Дина Нүрпейісованың образында ҚР мәдениет қайраткері Анар Мұздаханова өз өнерін көрсетті. Осы іс-шара барысында «Дегдар» гуанитарлық қоры қамқоршылық кеңесінің төрайымы Назарбаева Дариға Нұрсұлтанқызы әр өңірден келген қатысушыларға 160 домбыра тарту етті.
Соның ішінде Қостанай ауданы Тобыл қаласындағы «Алтын дән» МҮ қазақ этномәдени бірлестігіне 20 домбыра және «Ақ тілек» марапаты табыс етілді.
— Бәрекелді, құтты болсын! Бұл домбыраларға енді кімдер иелік етпек, қай өнер ұжымына табысталады?
— Аспаптар осы жылдың сәуір айында аудандық мәдениет үйінің базасында ашылған «Шаңырақ» ұлттық өнер орталығы жұмысының қажеттілігіне және аудан ұжымдарына пайдалануға беріледі. Барлық қатысушыларға ҚР Мәдениет және Спорт минисрі Ақтоты Рахметоллақызы мен «Дегдар» гуманитарлық қоры қамқоршылық кеңесінің төрайымы Дариға Нұрсұлтанқызы өнер өлкесінде жүрген жасөсірімдер мен балаларға ақ тілектерін білдірді.
— Жалпы, «Шаңырақ» ұлттық өнер орталығында басқа қандай игі жаңалықтар бар? Алға қандай жоспарлар құрылып отыр?
— «Шаңырақ» ұлттық өнер орталығында биыл көптеген жұмыстар атқарылып жатыр. Мәселен, ең соңғы рет 29 қыркүйекте облыстық халық шығармашылығының келісімімен «Шалқыма» облыстық вокалдық-домбырашылар ансамбльдерінің байқауы өткізілді. Байқауға облыстың 8 ауданы қатысты. Алдағы жоспарда қараша айында облыстық этноансамбльдердің байқауын өткізу жоспарланып отыр. Тағы басқа да көптеген жоспардағы мәдени іс-шаралар көрермендерімізді қуантар күн алыста емес деген үміттеміз.
— Өзіңізді оқырмандарымызға жақынырақ таныстыра өтсеңіз...
— Аты-жөнім – Айнұр Тойлыбайқызы Сейтова. Ұлт өнерінен нәр алып, дәстүрлі мәдениетпен сусындаған қазақ қыздарының бірімін. Республикалық «Мен қазақпын» тележобасының финалисі атанғанмын. Облыстық жыршылар мен термешілер байқауларының дипломанты болғанымды да қоса кетейін. Басқа да түрлі өнер сындарында бақ сынап, талай табыстарға жеттім. ҚР Президентінің «ХАЛЫҚ АЛҒЫСЫ» медалінің иегерімін.
