Бүгін Қостанай қаласындағы "Жастар сарайы" ғимаратында ақын, жазушы, драматург, көсемсөзші-журналист, Ақылбек Шаяхметтің 70 жасқа толуына арналған шығармашылық кеш өтті. Қабырғалы қаламгерге құрмет көрсетіліп, елдің әр өңірінен белгілі қоғам қайраткерлері мерейтой иесін құттықтай келді. Әдебиет пен мәдениет кеші өлең-жырмен өрнектеліп, әуен-сазбен әсемделді.
Қазақстан жазушылар одағының мүшесі, республиканың мәдениет қайраткері, Қазақстанның құрметті журналисі, Махмұт Қашқари атындағы сыйлықтың, "Алаш" халықаралық әдеби сыйлығының, Мухаммед Хайдар Дулати атындағы халықаралық әдеби сыйлықтың және "Алтын қалам" сыйлығының лауреаты... Тізе берсеңіз, Ақылбек Қожаұлының қазақ әдебиеті мен мәдениетіне сіңірген еңбегі үшін иеленген атақ-марапаты жетіп-артылады. Дарынымен дүйім елді баураған, жалынды жырымен жүректерді жаулаған ақынға бүгін лайықты құрмет көрсетілді.
Кеш басталмас бұрын көпшілікке арналып ғимарат кіреберісіне ақын шығармашылығына арналған көрме жайылды. Қонақтар шайырдың шығармашылық әлемімен танысып, естелік суреттерге түсіп жатты. Сахнаның өзі де іс-шараға сай әсем безендірілген. Сахна шымылдық көркем күймен айқара ашылған соң мерейтой иесі сахна төріне шақырылды.
Бұдан соң алғашқы құттықтау сөз Қостанай облысы әкімінің орынбасары Арман Әбеновке берілді. Ол Ақылбек Шаяхметке ҚР Президенті Қасым-Жомарт Тоқаевтың құттықтау хатын оқып берді. Сондай-ақ, аймақ басшысы Архимед Мұхамбетовтің Алғыс хатын, ықылас гүлін табыстап, иығына шапан жапты. Сондай-ақ, жазушының мерейтойымен құттықтаған Сенат төрағасы Мәулен Әшімбаев лебіз хаты тапсырылды.
Мұның сыртында, ҚР Жазушылар одағы басқармасының төрағасы, ақын Ұлықбек Есдәулет, Жоғарғы кеңестің экс-депутаты Серікбай Бисетаев, халықаралық "Алаш" сыйлыңының лауреаты, ақын Қасымхан Бегманов және белгілі ақын, мерей иесінің досы Әбжан Әбілтайлар сахна төріне көтеріліп, лебіздер легін жалғастырды. Сонымен қатар, кеш жүргізушілері Украинадағы Қазақ диаспорасы атынан Алтынбек Мұстапаев, Омбы қаласынан «Мөлдір» қазақ ұлттық орталығының төрайымы Алтынай Жүнісова жолдаған құттықтауларды да оқып берді.
Кеш иесі де толассыз тілек-лебіздер үшін алғыс білдіріп, дүркін-дүркін өлеңдерін оқып беріп отырды, бірде тұңғиық, бірде тым биік сезімге құлшындыратын ой-толғамдарына да көрермендерін ұйытты. Ақынның сөзіне жазылған көпшілікке танымал "Қостанай", "Әдемі", "Аға туралы ән", "Ақжолтай", "Көктемгі қар" секілді көптеген әндер және термелер орындалды.
Жетпістің желкелеген жампоз жазушыға сексеннің сеңгірінен асып өтіп, тоқсанға тоқтамай, жүзге жетуіне біз де тілектестік білдіреміз!
