Ән өнерінің тарланы Бүгін – танымал сазгер, әнші, Қазақстан Республикасының еңбек сіңірген қызметкері Бақытжан Сәуекеновтің туған күні.

Торғай даласында туып, тұтас қазақ еліне әсем әндерімен аты аян болған тұлға бүгін жетпістің жотасына шығып отыр.

Бақытжан Дәуренұлы – өмірі өнермен, өнегемен өрнектелген тұлға.

Ол өткен ғасырдың сонау 60-жылдарынан сахнаға шыға бастаған.

Жалпы есеппен алғанда, ағамыздың ән өнерінде жүргеніне 55 жыл болыпты.

Осынша уақыт бедерінде белгілі сазгер 80-ге жуық ән жазған, өнер сапарымен қазақтың байтақ даласының түкпір-түкпірін аралап, тіпті Мәскеу, Серия-Юрдания секілді алыс-жақын шетелдерге барып, ұлт өнерін, қазақ әнін насихаттай білді.

Осы жылдар ішінде Торғайда құрылған әйгілі "Ғасырлар пернесі" халық ансамблінде көркемдік жетекшісі болып қызмет етті. Сондай-ақ, Меңдіқара ауданында "Домбыра сазы" ұлт аспаптар ансамблін, "Әжелер" ансамблін құрды.

Бақытжан ағамыздың тамаша туындылары эстрада сахналарында шырқалып жүр.

"Даланың ару қызы", "Торғай қызы", "Киелі топырақ", "Анажан", "Өнерім – өмірім" сияқты көптеген әндері әлі күнге тыңдарман қауымның аузында жүр.

Әйгілі сазгер "Туған жер Торғайым" атты Торғайдың бейресми әнұранының авторы ретінде де жерлестері арасында үлкен құрметке ие.

Ел-жұртының ардақты азаматы, соңына ерген жас буын өнерпаздарға өнеге болар тұлға!

Мерей иесін 70 жасымен құттықтай отырып, ұзақ ғұмыр, зор денсаулық, асқақ абырой, үстем мәртебе, отбасына амандық, шаңырағына шаттық тілейміз!

Шабытыңыз шалқар, шығармашылығыңыз жемісті болып, әнсүйер қауымды таңғажайып туындыларыңызбен қуанта беріңіз, ән әуесіне биіктей түсіңіз дегіміз келеді!