Қазақтың көрнекті ақыны, жазушы, драматург, журналист Ақылбек Қожаұлы Шаяхмет Қостанай облысының Жітіқара ауданында Желқуар ауылында 1951 жылы 17 маусымда дүниеге келді. Жітіқара қаласында қазақ мектебін бітіргеннен соң, «Шевченко» кеңшарында шопан болып жұмыс істеді.
Алматыдағы Қазақ мемлекеттік университетінің журналистика факультетін және Москвадағы Әдебиет институтын бітірді.
Филология ғылымдарының кандидаты, ҚР мәдениет қайраткері, Қазақстанның құрметті журналисі, М. Қашқари атындағы түркі әлеміне сіңірген еңбегі үшін халықаралық сыйлықтың, «Алаш» және Мұхаммед Хайдар Дулати атындағы халықаралық әдеби сыйлықтардың иегері.
Ақылбек Шаяхметтің қазақ және орыс тілдерінде поэзиялық және прозалық он жеті кітабы шықты.
Шығармалары шетел тілдеріне аударылған. Балаларға арналған бірнеше кітаптары жарық көрді. Өлеңдері орыс мектептеріне арналған оқулықтарға енгізілген.
«Ақсұлу» тарихи драмасының, «Алғыс пен Қарғыс немесе жарық пен көлеңке», «Таза бұлақ» пьесаларының авторы.
Ақылбек Қожаұлының бірнеше өлеңдеріне әсем ән жазылды. Солардың бірі Ержан Серікбаевтің әуеніне жазылған «Әдемі» әні.
