ЖЕРЛЕСТЕРІМІЗ ЖЕҢІС ТҰҒЫРЫНДА!

Бүгін Бурабай курорттық аймағында "Рухани қазына – 2021" мәдениет саласы ұйымдары мен қызметкерлерінің IV республикалық байқауының жеңімпаздары салтанатты түрде марапатталды.

Олардың қатарында біздің облыстың өкілдері – мәдени-демалыс орталықтарының, музей және кітапхана қызметкерлері болды.

Биыл Қостанай облысының қоржыны беделді байқаудың төрт жүлдесімен толығып отыр.

Атап айтқанда, "Үздік облыстық маңыздағы мемлекеттік музей" аталымы бойынша Ыбырай Алтынсариннің облыстық мемориалдық музейі жеңімпаз атанды. "Үздік облыстық маңыздағы мәдени-демалыс кешенінің қызметкері" номинациясында облыстық көркемөнерпаздардың халық шығармашылығы мен кинобейнеқор орталығының көркемдік жетекшісі және "Шаңырақ" ұлттық өнер орталығының жетекшісі Айгерім Кушкимбаева топ жарды.

Сондай-ақ, "Үздік облыстық маңыздағы мемлекеттік кітапхана" аталымының жүлдесі Л.Толстой атындағы Қостанай облыстық ғылыми-әмбебап кітапханаға бұйырды.

Мұнымен қоса, Бердібек Соқбақбаев атындағы арнайы жүлде –балалар мен жаөспірімдерге арналған кітаптардың авторы, ақын, Қазақстан Жазушылар одағының мүшесі, "Шабыт" халықаралық фестивалінің Гран-При иегері, "QOSTANAI" телеарнасы директорының орынбасары Абылай Маудановтың еншісінде.

Жеңімпаз жерлестерімізді құттықтаймыз!

Айта кетейік, аталмыш байқауға елдің 15 өңірінен 300-ден астам өтінім келіп түскен. Үздік ұйымдарға 1 млн теңге, жеңімпаз қызметкерлерге 500 мың теңге көлемінде ақшалай сыйлық табыс етілді.