Бүгінгі тақырыбымыз Қостанай мен Торғай өлкесінің жұлдызы, еңбегімен елімізге танымал әнші-сазгер, «Қазақстан Республикасы мәдениетінің еңбек сіңірген қызметкері», «Қазақстан Республикасы халық білімінің үздігі», Қостанай облысы Амангелді ауданының құрметті азаматы Қалибек Деріпсалдин туралы болмақ.
Сазгер 150 ән мен бірнеше күйдің, «Көктем қыздар», «Домбыра сазы – Ерке құсым», «Айлы түнде», «Торғай әуендері» атты әндер жинақтары мен «Қимадым ғой» партитуралық әндер жинағының авторы.
Қазақстанның түкпір-түкпірінде өнер жұлдыздарымен шығармашылық концерттерін берді. Қостанай облысының мәдениеті мен өнерін насихаттау мақсатымен 45 жыл қызмет етіп, еліміздің құрметіне бөленді.
Бүгінгі күні Қалибек ағамыз денсаулығы сыр беріп сырқаттанып қалды. Ағамызға емі шипа болып, тезірек айығып, отбасына оралуына тілектестік білдіреміз. Әлі де өзіміз сүйіп тыңдайтын сазды әуендерінің қатарына қосылатын жаңа ән күтеміз.