сөзі Ибади Матақовтікі, әні Ахмет Жұбановтікі
Қазақ музыкасын зерттеуші ғалым, композитор, қазақтың тұңғыш дирижері, академигі, Қазақстанның халық әртісі Ахмет Жұбановтың 115 жылдығына орай.
Ахмет Жұбанов 1906 жылы Ақтөбе облысы Темір ауданы Ақжар ауылында дүниеге келді. Балаларының білімді болғанын қалаған әкесі Қуан ауылға келген Құсайын есімді мұғалімді үйіне жатқызады. Ол домбыра, скрипка, мондалин аспаптарында ойнаған, ал бала Ахмет мұғалімнен еш қалмағай, осы аспаптарда ойнауды үйреніп алған.
1929 жылы Ленинградтың М.И. Глинка атындағы техникумында консерваторияда оқиды. 1933жылы Алматыда ашылған музыкалық драма училищесіне ұстаздық қызметке шақырылады.
1936 жылы «Музыка әліппесі» атты алғашқы кітапшасы жарық көреді.
1938 жылдан бастап Ахмет Жұбанов композиторлық жұмыспен айналыса бастайды. Жазушы Ғабит Мүсіреповтің «Қозы-Көрпеш – Баян сұлу» драмасына, Мұхтар Әуезовтің «Абай» спектакліне, «Амангелді» кинофильміне музыка жазды. Камералық шығармалардың ішінде «Қазақтың жеті биі», «Тәжіктің он биі» сияқты фортепианоға арналған, «Көктем», «Ария», «Романс», «Жезкиік» сияқты көптеген шығармалары қазақ өнерінде ерекше орын алады. Қызы Ғазиза Жұбанова әке ісін жалғастырған алғашқы әйел композитор.
А.Қ.Жұбанов қазақтың ұлттық өнерін дамытып, жаңа дем беріп, өшпес мәдени мұра қалдырды.
Ибади Матақовтың жұбайына арнап жазған «Қарлығаш» өлеңін Ахмет аға оқып, ән жазуға келіседі. Сәтті шыққан ән сахнадан, радиодан жиі орындалып, ел арасына тез тарайды.
