Құрметті қостанайлықтар! Бүгін, 2021 жылдың 3 наурызында «Алаш» партиясының бағдарламалық жобасын жасаушы, журналист Ғазымбек Бірімжанның 125 жылдық мерей тойына арналған «Ғазымбек Бірімжан. Шығармалар жинағы» кітабы Қостанайға жеткізілді.

Бұл ғылыми еңбекті кітаптың авторы, баспаға дайындап құрастырушы, ғылыми түсініктерін жазған филология ғылымдарының магистранты, жас зертеуші Данияр Ихсан өз қолымен табыстады.
Аталмыш кітап, Қостанай облысы әкімдігінің Мәдениет басқармасы қолдауымен жарық көрді.

Бұл еңбекке Ғазымбектей Алаш арысының өмір жолы, қоғамдық-саяси қызметі мен шығармашылығы туралы әр жылдары жазылған зерттеулері мен естеліктері топтастырылған.

Алаш қайраткері, «Алаш» партиясының бағдарламалық жобасын жасаушы, 1921-1922 жылғы аштық кезінде сөзімен де, ісімен де халыққа жанталаса көмектескен, «Ақ жол» газетінің редакторы, мал дәрігері, агроном-ғалым, Берлинде оқыған тұңғыш қазақ Ғазымбек Бірімжанның шығармалар жинағы күні бүгінге дейін жарық көрген емес. Алғаш рет құрастырылып, оқырман назарына ұсынылып отырған қайраткер-қаламгердің шығармалар жинағына ұлттық маңызы зор жазбалары мен әдеби-публицистикалық мұрасы, саяси мақалалары мен ашаршылық кезіндегі үндеулері кіріп отыр.

Бұрын соңды беймәлім болып келген қайраткер тұлғаның қазақ халқына, қалың оқырманға таныстыру жас зерттеуші Данияр Ихсанның осы еңбегінде кеңінен қамтылған. Алаш арысының өмір жолы мен еңбектері жайлы кітап, облыстың барлық кітапханаларына таратылатын болады.