Құрметті Жүрсін Молдашұлы!
Сіз поэзия əлемінде өзіндік орны бар, талғамы биік оқырманның жоғары бағасын алған, сара сөздің шебері ретінде құрметке бөленген ақынсыз. Төл əдебиетіміз бен мəдениетімізді байытуға өлшеусіз үлес қосып келе жатқан адуынды ақын, қажырлы қайраткерсіз.
Ұлытау мен Алатаудың арасын жырмен жалғаған «Айтыстың қара нары» атанған Сіздей тұлғаны қазаққа таныстырып керегі де жоқ.
Осы келген жасыңыздың басым бөлігін айтысқа арнап, талай жүйрікті тәрбиелеп, талай ақынның бағын ашқан Сізге де, өлеңіңізге де әдебиет әлемінің танымал қаламгерлері бір сөйлеммен өз бағаларын беріп-ақ қойған. Белгілі сатирик Көпен Әмірбек «Жүрсін – ақындар университетінің ешқандай бұйрықсыз бекітілген ректоры» десе, ақын Серік Ақсұңқарұлы «Жүрсіннің 70 өлеңін 70 томға айырбастамас едім» деп бағалайды.
Қазақтың төл өнері – «Айтысты» қалпына келтіру, жаңартып-жаңғырту, оны теледидар мен радиода насихаттау, оған меценаттар тарту арқылы жан-жақты колдау көрсетіп, халық өнерін кеңінен насихаттап, ұлттық рухты биікке көтеруге қосқан үлесіңіз барша қазаққа аян.
«Алаш барда – айтыс өлмейді» деп айтқан ұраныңыз Тобыл-Торғай өлкесінің ақындарына да қанат беріп, үлкен мектеп қалыптастыруға жол ашқаны анық.
Ұлтымыздың төл өнерінің жырын жырлап, өркендеуіне бар күш-жігерін арнаған Жүрсін ағамызды біз де 70 жасымен құттықтап, халық өнерінің қамын ойлап, халқының алдында ЖҮРСІН деген тілегімізді қабыл алыңыз!
_____________
Ізгі тілекпен:
Облыстық көркемөнерпаздардың халық шығармашылығы мен кинобейнеқор орталығы ұжымы
