Ертең, 10 қаңтарда Қазақстан Республикасы Парламенті Мәжілісі және мәслихаттары депутаттарының кезекті сайлауы өтеді.

Қазақстан халқымен бірге өңірдің мәдениет және өнер саласының қызметкерлері де ел болашағы үшін маңызды таңдау жасайды. Үгіт-насихат жұмыстары барысында партиялардың сайлауалды бағдарламаларымен танысып, алдағы жоспарларынан хабардар болғанымыз анық.

Еліміздің Тұңғыш Президенті – Елбасы Нұрсұлтан Назарбаевтың «Мәдениеті жоғары, тарихи танымы орнықты, ойы сергек елдің рухы да биік» деген сөзі –мәдениет пен өнердің тәуелсіз Қазақстанды елдік мұрат, ұлттық мүдде тұрғысында насихаттауда ролінің зор екендігінің айғағы.

Биылғы жылды тарлан тұлғаларды, тарихқа тағзым мен ұлттық құндылықтарды жас ұрпақтың бойына дарыту, тұрақтылық пен тыныштықты насихаттайтын айтулы мерейтойлар және атаулы даталармен атап өткелі отырмыз. Олардың ішінде ең маңыздысы Ыбырай Алтынсариннің 180, Жамбыл Жабаевтың 175, Қажымұқан Мұңайтпасұлының 150, Қамбар Медетовтың 120, Ахмет Жұбановтың 115, Бәкір Тәжібаевтың 95, Мұқағали Мақатаевтың 90 жылдығына және Желтоқсан оқиғасының 35, Қазақстан Республикасы Тәуелсіздігінің 30 жылдығына арналған іс-шаралар бар.

Елімізде жер-жаһанға қауіп төндірген пандемияға қарсы күрес әлі де жалғасуда.

Біз бұл жағдайда мәдени шараларды ұйымдастырып, өткізу барысында ысырапшылдыққа жол бермеу қажетіне ден қойамыз.

Өз кезегінде біз де елімізді одан әрі өркендету ісіне, халқымыздың келешегінің кемел болуына барлық қажыр-қайратымызды жұмсап, тәуелсіздігімізді бірге баянды ете берейік.