«Қостанай облысы әкімдігінің мәдениет басқармасы» ММ, «Қостанай облысының білім басқармасы» ММ қолдауымен қазақ халқының  бірегей, дегдар өнер түрлерінің бірі айтыс жанрын дамыту және көркем әдеби тіліміздің мәртебесін көтеру, жас ұрпаққа жеткізу, Қостанай өңіріндегі жас таланттарды анықтап,  қолдау көрсету мақсатында  2017 жылғы  21 сәуірде  Меңдіқара ауданында  Алаш партиясының құрылуының XXV облыстық «Жас тұлпар» оқушы ақындар айтысы болып өтті.  Айтыс деңгейі  жоғары болды. Оқушы ақындар  бір-бірімен жауаптасып, әзіл, орынды теңеулер қолданып, балауса жырлары арқылы  суырып салма өнерді меңгергендігін көрсетті.
Меңдіқара жерінде өткізіліп отырған айтысқа көрермендер көп жиналды. Қостанай облысында  ХХV рет өткізіліп отырған облыстық  «Жас тұлпар» оқушы ақындар айтысына Арқалық, Рудный, Қостанай қалалары және Амангелді, Таран, Қарабалық, Әулиекөл, Қостанай, Қарасу, Денисов, Жітіқара, Алтынсарин, Меңдіқара, Науырзым, Сарыкөл ауданынан  16  өнерпаз  жас ақындар қатысты.
Облыстық «Жас тұлпардың» оқушылар айтысына  жиырма бес жыл бойы қазылар алқасының төрағалық еткен сатирик, жазушы, Қазақстан Жазушылар Одағының мүшесі Ғұмар Ғарифұлы Ахметчинді және жас ақындарды баулып, айтысқа қазылық еткен  айтыскер ақын, Қазақстан Республикасының мәдениет қайраткері Әлпия Карбозқызы Урманшинаны құттықтап,   сый-сияпат жасады.
 Айтысқа танымал өнер қайраткерлері, ақын – жазушылар  Ғ.Ахметчин, Ә. Урманшина, С.Өтелбаева, облыстық «Қостанай таңы» газетінің тілшісі, ақын, журналист Қ.Қиысхан және облыстық мәдениет басқармасының бас маманы Р. Олжабаева төрелік  етті.  
Айтыс қорытындысы бойынша, Бас бәйгені  Дінмұхамед   Құсайынов (Меңдіқара ауданы),  І – орын  Мықыш Жанболат (Амангелді ауданы), ІІ- орын Нұрмұхамед Бекзат (Жанкелдин ауданы) және Еркебұлан Әсет   (Таран ауданы),  ІІІ- орын Талапұлы Талғат (Арқалық қаласы),  ІІІ–орынды Мақанова Айдана (Науырзым ауданы), Сәндібек Ержан (Алтынсарин ауданы) иемденді.
«Ыбырай Алтынсарин атындағы жүлде» Сибанбаев Әлтаир (Сарыкөл ауданы), «Ахмет Байтұрсынов атындағы жүлде» Мысыр Доспол (Қостанай қаласы), «Міржақып Дулатов атындағы жүлде» Төрезат Әлфараби (Жітіқара ауданы) табысталды.   
Қатысқан барлық оқушыларға  Дипломдар табыс етілді.
 «Жас тұлпар» айтысына жас ақындарды баулып, тәжірибелі тәлімгерлігі үшін  жас ақындардың жетекшісі  Бүркіт Бекетов (Амангелді ауданы) Қостанай облыстық мәдениет басқармасының, Қостанай  облыстық білім басқармасының «Алғыс Хатына» ие болды.
Дәстүрлі түрде өткізіліп отыратын облыстық «Жас  тұлпар»  айтысы өз жалғасын таба бермек. Алаш партиясының құрылуының 100 жылдығына арналған XXV облыстық «Жас тұлпар» оқушы ақындар айтысы  жөніндегі ақпарат облыстық «Қостанай таңы», аудандық «Меңдіқара үні» газетінен жарық көрді.