Қош, қадірлі қаламгер! Бүгін белгілі жазушы, сатирик, журналист, қоғам қайраткері, Қазақстан Жазушылар одағының мүшесі Ғұмар Ахметчин өмірден озды.

Ғұмар ағамыз 1941 жылы 8 қыркүйекте Ресейдің Златоуст қаласында туған. 1959 жылы Қостанай облысы Семиозер ауданындағы мектепті, 1968 жылы ҚазМУ-дің журналистика факультетін бітірген.

1966 жылдың ақпан айынан бастап, ұзақ жылдар бойы облыстық «Қостанай таңы» (ол кезде «Коммунизм таңы») газетінде мәдениет және тұрмыс, хат бөлімдерінің меңгерушісі, 1984 жылдан редактордың орынбасары және Бас редактор болды. 1992 жылдан бастап облыс әкімінің баспасөз хатшысы, облыс әкімі аппаратының бас маманы қызметтерін атқарды. Қазақстан Жазушылар одағы Қостанай облысы филиалының директоры болып қызмет етті. Республикалық «Ара» журналының облыстағы тілшісі болған. «Жалын» баспасынан «Қолды болған қораз», «Көзілдіріктің кесірі», «Көзі сынық тебен», «Елорда» баспасынан «Ұмытшақтық зобалаңы» сатиралық жинақтары жарық көрді.

Елеулі еңбегі үшін Қазақ КСР Жоғарғы Кеңесінің Грамотасымен, бірнеше медальмен, оның ішінде «Астана» және «Тәуелсіздікке–10 жыл» медальдарымен, ҚР Мәдениет және ақпарат министрлігінің «Мәдениет қайраткері» белгісімен марапатталған. Қазақстан Республикасының еңбек сіңірген мәдениет қызметкері атанды. Облыстық Меценаттар клубы тағайындаған «Қазына» сыйлығының лауреаты.

Өңір әдебиеті мен мәдениетінің дамуына өлшеусіз үлес қосқан қаламгердің артында белгі болып қалған рухани мұрасы кейінгі буынға үлкен өнеге болып қалмақ. Жайсаң ағамыздың жарқын бейнесі мәңгілік жадымызда сақталады.

Алла панасына алып, жанын жәннаттық еткей. Алды пейіш, арты кеніш болып, соңында қалған ұрпақтарына ұзақ ғұмыр берсін! Бақұл бол, қадірлі қаламгер!