Серігі – сазгерлік, кәсібі

Сазгер Серік Нұғыманов 1955 жылы Жезқазған қаласында дүниеге келген. Әкесінің қызмет бабына байланысты Ұлытау ауданы Шеңбер, яғни Кейкі батыр бабамыздың үңгірі орналасқан ауылға көшіп, сол ауылда мектепті бітірген.

Жасынан өнерге жақын болған болашақ сазгер, ән айтып, ауыл ішінде, аудан, тіпті облыс көлемінде сахнаға шығып өнерін көрсетіп, талайдың көңілінен шыға білген.

8-сынып оқып жүрген кезінде алғашқы туындысы дүниеге келіп, мектеп интернатында бірге жатқан 2 сыныптасына тыңдатқан. Бұл әнін тыңдаған сыныптастары: "Шәмші болам дегенің бе?!" - деп шымшып әзілдегеннен кейін, Серік Нұғманов ән жазуын тоқтатады. Бірақ сол бір әуен көңілінен кетпей, жалғыз қалғанда ыңылдап айтып жүреді. Бойында сазгерліктің ұшқыны бар екенін біле тұра ұзақ уақыт әннен алшақтайды. Балалық шағының көп бөлігі Ұлытау ауданы Терісаққан ауылында өтті. Қазіргі туындыларының көбі осы ауылға арналған.

Жылқы жануарын ерекше жақсы көрген Серік Нұғыманов 1975 жылы әскери борышын өтеп келгеннен кейін Торғай облысы Арқалық қаласы, Мотросов совхозында жылқы бағумен айналысады. Ақмола облысы мен Қостанай облысының, бұрынғы Торғай облысының көптеген ауылдарында қызмет атқарды. Ат үстінде жүрсе де, музыкалық білімі жоқ Серік Нұғыманов музыкалық аспаптың бәрінде ойнаған. Сол уақыттан бастап күні бүгінге дейін 45 жыл аттан түспей, қыл құйрықты жануар баптаумен келді.

Осы аралықта сазгердің көптеген әні дүниеге келді. Қарағандылық "Дәридай ақын" деген атпен танымал Мұқаш Сейтқазиновтың "Шеңберім" өлеңіне ән жазды. "Терісаққаным", "Ауылым" туындыларын туған жеріне арнапты. Атақты әнші Ғұсман Наурызбаевқа арналған Ақылбек Шаяхметтің өлеңіне де әуен жазды. Әнді белгілі әнші-сазгер Қалибек Деріпсалдин нотаға түсірді. Бұдан бөлек немерелеріне арнап "Немерем" деп аталатын ән жазды. 2015 жылы алматылық "Нұржайлау" шаруа қожалығына шақырылып, сонда қызмет етіп жүргенде "Нұржайлау" атты ән жазды.

Сазгер әрі ата кәсіп иесі қазіргі уақытта Арқалық қаласында тұрады. Ұзақ жылғы адал еңбегінің арқасында зейнетке шығып, балалары мен немерелерінің қызығын көріп, шаңырақтың тірегіне айналған ардақты ақсақал болып отыр.

АУЫЛЫМ

әні, сөзі. С.Нұғыманов

Сағынышты іште тұнған,

Жолдайыншы ән етіп.

Сенде өсіп, сенде туған,

Азамат бой, жар ертіп.

Қайырмасы:

Баурайыңа қоныстанған,

Ауылымның сәні екен.

Өзге жерден биік тұлғаң,

Еңсең биік Халетім.

Терсақаным ерке өзенім,

Көрейінші көркіңді.

Көктем сайын тасатын ек,

Ағысыңда серпінді.

Қайырмасы:

Еш табиғат бұра алмаған,

Ағам деген еркіңді.

Сыңси ағып бұраңдаған,

Ерке ару секілді.

Алтын Орда ауылыма,

Ақ басымды сан идім.

Құда-жекжат, бауырыма,

Достарыма сан игі.

Қайырмасы:

Қымбат маған әр қарияң,

Қымбат маған әр үйің.

Көк жүзінде будақтаған,

Түтініңнен танимын.