А.Жұбановтың: «Динаның «Бұлбұлында» құстың үні жай ғана көрсетіліп қоймайды, күйде сезім бостандығы, ой мен арман идеясы айқын берілген», – деп атап көрсеткеніндей, бұл күйдің мән-мазмұны бұлбұл құспен ғана байланысты емес, адам тағдырымен ұштасып жатыр.
Мұнда Балғын атты әнші қыздың бақытсыз өмірі, қасіретті тағдыры суреттеледі. Күйші өнерлі, әнші қызды бұлбұл құсқа теңей отырып, оның басындағы қайғы-мұңы туралы тебірене баяндайды.
Бұл күйді Жаппас Қаламбаевтың оркестрге лайықтап түсірген ноталық жазбасы бойынша консерватория, училище студенттері мен домбырашылар орындап жүр.
