Шәмші әндері ғажайып саздылығымен, сылдырап аққан бұлақ суындай тап-таза сыңғырымен, лирикалық наздылығымен ерекшеленеді. Оның шығармашылық жағынан сіңірген еңбегі қазақ эстрадалық әндерінің әуенін ұлттық нақышпен құнарландыруында, халықтық қайнармен қабыстыруында жатыр.
Белгілі ақын Қадыр Мырзалиев «Иірім» атты кітабында сазгер Шәмші ақын Қадырды үйіне шақырып, Өзбекстанның Бұхара облысы Тамды ауданына барып қайтқанын, сондағы елге «Тамды туралы ән жазам» деп уәде бергенін айтады. Барған ауылдардың атауларын қағазға түсіріп, осы елден ойша бір қызды «табуын» және сол қызға «ғашық болуын», сөйтіп, сол аруға арнап өлең жазуын ақыннан өтініпті. Қадыр ақын сол естелігінде, «Мыңбұлақ» атауының көңілге қонғанын, трамвайда үйіне қайтып бара жатып, «Бұрымың, Мыңбұлақта туған ару, Сол жердің мың бірінші бұлағындай» деген тіркес туғанын айтады. Ән Өзбекстандағы Тамды ауданының аруларына арналған.
