ТУҒАН КҮНІҢІЗБЕН ҚҰТТЫҚТАЙМЫЗ!!!

Құрыштан құйған құдірет!..

Бүгін Қостанай өңірінің қазынакеуде қариясы, жыр мен саздың дариясы, ҰОС ардагері, ұлағатты ұстаз, қаламы жүйрік журналист Қасымхан Алдабергенов 95 жасқа толды.

Мерей иесін бір дәуірдің шежіресіндей тұлға, сегіз қырлы, бір сырлы дарын иесі деуге болады. Оның бозбала шағы сұрапыл соғыспен тұспа-тұс келіп, 17 жасында майдан даласына аттанды. Жаужүрек сарбаз соғыс аяқталып, елге оралған соң қолындағы қаруын қаламға айырбастады. Облыстық баспасөзде тілші болып қызмет етіп, шығармашылығын шыңдады. Бүгінгі өскелең журналистерге сабақ болар көптеген дүние жазды. Ұстаздық еңбегі де өмірінің өнегеге татырлық белесі. Ал, енді, ұлтымыздың жыршылық-термешілік мұрасын насихаттауға қосқан үлесі ұшан-теңіз. Құймақұлақ орындаушы қазақтың алтын қорына көптеген жауһар шығармалар қосты. Олардың қатарында ұлы Абайдың "Масғұт", "Ескендір" поэмалары, сондай-ақ төл туындылары сақталулы. Атамыз айтыс өнерінде де өз қолтаңбасын қалдырды. Кешегі Нұрхан мен Омардың жұрнағындай жалғасқан ақпа ақын, Әбділдә Тәжібаевтан бата алған хас өнерпаз. Мұны қасиетті қара сөздің қайнарын қанып ішкен кез келген қазақ біле жүрсе керек.

Сүйегі асыл Қасымхан атамыз тоқсанның бесеуіне келсе де еңсесі тік, әлі күнге газет-журналды көзілдіріксіз оқиды, қаламы мен қара домбырасы қолынан түсіп көрмеген. Құрыштан құйған құдіреттей болған қадірменді қарияға қажымас қайрат, мықты денсаулық тілейміз! Көненің көзіндей, асылдың сынығындай, тұманың тұнығындай тұлға ақ тілеулі халқының алдында аман-есен жүре берсін, жасы жүзден асып, ұрпағымен мың жасасын дегіміз келеді!