«Сағындырған әуендер» айдары Шәмші Қалдаяқовтың әні «Ана туралы жыр»

«Ана туралы жыр»

Бір қолымен әлемді, бір қолымен бесікті тербететін ананың еселі еңбегін ешкім де, еш уақытта өтей алмасы хақ. Алайда, оның есімін ұлықтап, құрмет көрсету әрбір перзенттің парызы. Анаға қаншама ән шырқалып, жыр жазылды. Соның бірі - «Ана туралы жыр». Қазақ халқының біртуар перзенті Шәмші Қалдаяқовтың бұл әнін естіген бойда, кез келген адамның жүрегі елжіреп, анасына деген ыстық сағынышы басылатыны сөзсіз.

Шәмші Қалдаяқов консерваторияда оқып жүрген кезінде ауылынан анасы өмірден озғаны туралы суық хабар жетеді. Қаралы хабарды естіген бойда ол оқуын тастап, ауылына асығады. Анасының мезгілсіз қазасы оның жанына қатты батады. Келмеске кеткен аяулы анасына деген бар жылулығы мен сағынышын жеткізу мақсатымен ол ән жазады.

Белін бекем буып, Алматыға оралған бойда ол Жазушылар Одағына барады. Ақын-жазушы замандастарына жолығып: «Ана туралы өлең жазып беріңдер, жігіттер» деп қолқа салады. Сонда оған замандастары: «Жақында Ғафудың да анасы өмірден өтіп еді. Сен одан да сол жігітке бар» деп жауап қатып, жол сілтейді.

Шәмші дереу ақын Ғафу Қайырбековке жолығып, әнін тыңдатады. Ғафу әнді тыңдап, біраз уақыт үнсіз отырады. Ол да анаға арнау ретінде жыр жазуды ойластырып жүрген екен. Сазгердің мұңлы сазынан кейін ол 15 минуттың ішінде «Ана туралы жыр» әнінің мәтінін жазып береді. Әсем ән бірталай әншінің ән қоржынан орын алды.