Сөзі: Мұхтар Шахановтікі, әні: Шәмші Қалдаяқовтікі
Қазақ вальсінің королі атанған Шәмші Қалдаяқовтың небір әндері халық жадында сақталып қана қоймай, алып қазынаға айналғандай. Шәмшінің кез келген әні бір әлем іспетті. Әрқайсысының өз тарихы, өз жолы, өз орындаушысы бар. Сол әндердің бірі – «Өмір-өзен».
Бұл ән өткен ғасырдың 70-80 жылдарында жазылғанмен халыққа кешігіп жеткен болатын. Ән мәтінінің авторы қазақтың көрнекті ақыны Мұхтар Шаханов. Ақын «Өмір-өзен» өлеңін жалындаған жастық шағында өмірге деген құлшынысы зор, болашаққа деген сенімі мол кезде үлкен шабытпен дүниеге әкелсе керек.
Кейін өлең жолдары Шәмші Қалдаяқовтың қолына тиіп, әуен жазады. Әуелі жаңа ән кішігірім басылымдарда жарық көреді. Бірақ, орындалмай, ұмытылып қалады.
Ақын Мұхтар Шаханов Қырғыз еліндегі Қазақстанның елшілігінде қызметте болған кезде мұрағаттарды ақтарып, іздеп жүріп «Өмір-өзен» әнін тауып алады. Араға отыз жыл салып ән халыққа жетеді.
Ән халыққа әнші Алтынай Жорабаеваның орындауында кеңінен тарады. 2000 жылы әнші «Өмір-өзен» әнін репертуарына қосып, бейнебаян түсіріп, елге осы әнмен танылады. Уақыт өте келе «Өмір-өзен» әншінің бойтұмар әніне айналды.
