«Қазақтың дәстүрлі 1000 күйі» айдары Халық күйі «Бозінген» - орындаған Тұрымтай Мүсірбайұлы
19.06.2020
3080
0
Ақпаратты достарыңызбен сілтеме арқылы бөлісіңіз:
Бозінген (халық күйі)
Күйдің аңызы: Ақтабан шұбырынды, алқакөл сұлама заманы болса керек. Халық басына күн туып, елі-жерінен айырылған ауыл дүрбелеңге түскен сол бір шақта орта дәулетті біреудің ақ інгені болған екен.
Ботасы сонда оққа ұшады да, иесі ақ інгенге жүгін артып, күнді-күнге, түнді-түнге ұрып босып, ауа көшкен елмен бірге кетеді. Бір жерге жетіп, көліктердің белін суытып, адамдары демалады.
Кешке ақ інген өзге түйелердің ішінде жоқ болып шығады. Іздеп таппайды. Ақ інген сол кеткеннен мол кетіп, ботасының жемтігі қалған жаққа қарай бет алған жолда азықсыраған қалмақтардың қолына түседі.
Ашыққан жаулар ши бөріше қаптап, тарпа бас салып, жығып, төрт аяғын байлап, бауыздауға ыңғайланған сәтте, інген өте бір аянышты дауыспен ыңырси боздап, екі көзінен жас сорғалап бейне адамша жылаған екен дейді.
Сол кезде өздері аға тұтар біреуі: «Астарыңдағы аттарыңды сойсаңдарда, андағы інген түйеге тиіспеңдер», – дейді.
Босаған бозінген алдымен оң жағына қарап бір боздап, сол жағына қарап бір боздап, үшінші ретте алдына қарап бір боздап алған бағытына қарай желе жөнелген екен.
Ботасының жемтігін тапқан соң бір тал шөп жұлмай жатып сол жерде өлген екен.
