Облыстық «Жас тұлпар» оқушы ақындар айтысы қарсаңында жас ақын Нығметов Даниярмен сұхбат

Өзіңізді таныстырып өтсеңіз, айтыс өнеріне қалай келдіңіз?

Өзім жайлы айтар болсам, Нығметов Данияр Рудный қаласының Бейімбет Майлин атындағы №7 мектеп-гимназиясының 11 сынып оқушысы боламын. Айтыс өнеріне келетін болсақ, Мұқағали атамыз айтқандай:

Ақынмын деп мен қалай айта аламын,
Халқымның өзі айтқанын қайталадым.
Күпі киген қазақтың қара өлеңін,
Шекпен жауып, өзіне қайтарамын – дегендей әр қазақ баласы өлең шығара алады әр қазақ баласының бойында жыр ұшқыны бар деп ойлаймын.

Ең алғаш айтыс сахнасына 9 сынып оқып жүргенімде шықтым. Айтысқа келуім бірінші Алланың қалауы болса, екінші болам деген баланың бетін қақпай тілеулес болып отырған ата-ананың арқасы деп білемін. Бұлақ көрсең көзін аш дегендей білім ордамыздың ұстаздары әдебиет, айтыс өнеріне қызығушылығымды арттырды.

Ы.Алтынсарин атындағы дарынды балаларға арналған мектеп- интернатында өткен «Қазіргі айтыс: жетістіктер мен кемшіліктер» тақырыбындағы шеберлік сағатынан алған әсеріңіз?

Айтыстың ақтаңгері Айбек ағамыздың өткізген шеберлік сағатынан өте жақсы әсер алдым. Айтыстың қыр сырын суырыпсалмалық мәселесін, әртістік қабілет болу керектігін айтып, біздей жас ақындарға жол көрсетіп батасын берген болатын.

Ыбырай атындағы ол мектепте,
Талай текті тұлғаның сыры қалған.
Мен дағы сол тектінің жолымен,
Намыстың құламайтын туын алғам.

Қазағымның маңдай бағы бес елі екен,
Айбектей ақтаңгердің жыры қалған.
Менің де маңдай бағым бес елі екен
Ақтаңгердің өзінен білім алған

Республикалық айтысқа қатысып, үлкен сахнада өнер көрсетіп келдіңіз сол жөнінде айтып өтсеңіз?

Республикалық «Абай жаққан бір сәуле сөнбеу үшін» атты айтысқа келер болсақ, Алматы қаласының қақ төрінде 21 қараша күні өткен болатын. Айтыс өте жоғары деңгейде өтті. Республикамыздың түкпір-түкпірінен іріктелген 16 айтыс ақыны бақ сынаған айтыста төрағалық еткен Жүрсін Ерман бастаған елімізге белгілі Серік Қалиев, Талант Арынғали, Рүстем Қайыртай сынды ақын ағаларымыз қазылық еткен болатын. Ондай айтысқа қатысудың өзі үлкен мәртебе деп ойлаймын. Ал сен тұр мен атайын деген жүйріктердің арасынан оза шауып елдің ықыласына бөлену бөлек әңгіме басқаша сезім. Барша Тобыл Торғай елі сенім артып, үкілеп жібергеннен соң елімді көш соңында қалдырмауға тырыстым.

Облыстық «Жас тұлпар» оқушы ақындар айтысына дайындығыңыз қалай?

Наурыздың 20 күні өтетін дәстүрлі түрде ұйымдастырылатын облыстық
«Жас тұлпар» оқушылар айтысына дайындығым жақсы деп айта аламын.
Берілген тақырып «Ыбырай жаққан шамшырақ» Ыбырай Алтынсарин негізін қалаған тұңғыш мектебінің 135- жылдығына арналады. Тақырыпты кеңінен ашып жақсы айтыс жасауға, сеніп отырған Сарбай елін көш соңында қалдырмауға тырысамын.