Сазгер Шығанбай Мұңлыбек Қабидоллаұлымен сұхбат

Өзіңізді таныстырып кетсеңіз?

Мен Шығанбай Мұңлыбек Қабидоллаұлы 1957 жылы 7 ақпанда Қостанай облысы, Жангелдин ауданы, Жаркөл ауылында дүниеге келдім. Қазіргі уақытта Әулиекөл ауданы, Москалев орта мектебінде музыка пәні мұғалімімін.

Өнерге қалай келдіңіз?

Шешем қазақша, татарша әндерді жақсы айтатын, шешемнің өнері маған дарыған деп ойлаймын.

Қашаннан бастап ән жаза бастадыңыз, бірінші шыққан әндеріңізге тоқталып кетсеңіз?

1980-1984 жылдары Арқалық музыка учелищесінің хор дирижері мамандығын оқып бітірдім. Мектепте музыка пәні мұғалімі болып жұмыс істедім. 1985 жылы Жеңістің 40 жылдығына арнап, «Болмасын соғыс» деген алғашқы әнім жарыққа шықты. Сөзі – ағайым Жалғасбай Шпановтікі. Сол жылы туған жеріме «Жаркөл вальсі» деп ән арнадым, сөзі – Ж.Шпановтікі. Солай-солай балаларға арнап «Апам менің жақсы адам», «Әліппе туралы ән», «Анаға жыр», «Мектеппен қоштасу әні», «Ардақты мұғалім», «Үлкендерге арнау», «Туған жер сазы», «Дарасың жаным», «Сағыныш сазы», «Ана», «Анама» әндерін жаздым. Ол туындыларымның көбі 1993 жылы Қостанай телеарнасынан берілді. 2000 жылы «Мәдениет жылы» деп жарияланып, аудан орталығы Торғайда есеп беру концертімді өткіздім. 30 әнім бар.

Қазіргі жаңа шығып жатқан әндерге көңіліңіз тола ма?

Жаңа шығып жатқан әндердің тыңдайтыны да, жалықтыратыны да бар. Бірақ, бұрынғы әндер сондай сезіммен берілсе, ал қазіргі әндерде жай ғана ырғақ, сөзінде еш мағына жоқ.

Алдағы шығармашылық жоспарыңыз?

Жазда мектеппен қоштасып, әдемі өлеңдерімнен концерт дайындап, әніме сөз жазған ақындарды шақырып, жолдастарыма, еліме шығармашылық концерт берсем деймін.