Дала өлкесі тарихы облыстық музейінің ғылыми қызметкері, жас ақын Батырлан Сағынтаевтың жаңа еңбегі жарық көрді. «Ескі сөз – ел мұрасы» деп аталған жинақтың тұсауы Арқалықта кесілді. Кітап Елбасы Нұрсұлтан Назарбаевтың «Ұлы даланың жеті қыры» мақаласына орайластырылып шығарылған. 
 

Жинақ төрт бөлімнен тұрады: жыр-дастандар, магиялық фольклор, ғұрыптық және дидактикалық фольклор. Еңбектің басым бөлігінде Тобыл-Торғай өңірінен жинақталған мұралар берілген. Жиырмасыншы ғасырдың басындағы Қазан төңкерісіне дейін жарияланған шығармалар, кеңес дәуірінде саяси-идеологиялық бақылауға алынып, цензура сүзгісімен  жарық көрген туындылар қамтылған. Сондай-ақ, құрастырушы кітапқа әртүрлі себептермен жариялауға тыйым салынған шығармалар мен қолжазба күйінде жеткен материалдарды, мерзімді басылымдарда басылған ауыз әдебиеті үлгілерін енгізген.  

«Бұл кітаптың ішінде өңірдегі халық шығармалары жинақталғандықтан, осы елдегі әдебиеттің, мәдениеттің қандай болғанын жан-жақты және әділетті бағалауға мүмкіндік береді деп ойлаймыз», - дейді жинақ авторы Батырлан Сағынтаев.

«Бұл жұмыс жалғасуы керек. Өйткені, ел аузында жүрген дүниелер әлі жетерлік. Соның бәрін хатқа түсірсе, ұлт мұрасына қосылған қазына еселене түсер еді» дейді авторға ақжарма тілек айта келген қауым. Кітаптың тұсаукесер рәсімін өткізу құрметі мәдениет қайраткері Жұмағали Өмірбеков пен Батырланның ұстазы, Айтыс ақтаңгері Айбек Қалиевке берілді.

Жинақты құрастыруға жазушы, тарихшы Қойшығара Салғараұлы мен өлкетанушы Мұхтар Қоденұлы үлес қосты. Дала өлкесі тарихы облыстық музейінің ұжымы да қолдау көрсеткен.