«Тобыл торғай әуендері» рубрикасының кейіпкері Облыстық халық шығармашылық орталығы жанынан құрылған композиторлар көркемдік кеңесінің басшысы - Азамат МҰҚАТОВ
Өзіңізді таныстырып кетсеңіз...
Мен Мұқатов Азамат Қабжәлелұлы Қостанай облысы, Аманкелді ауданының тумасымын.
Өнерге қалай келдіңіз?
Өнерге келуіме біріншіден Аллаға шүкір, ата - анамның арқасында. Ол кісілерде өнерден бал тамған жандар.
Өнерге сол ата анамнан жұққан дарынымен келдім. Алғаш мектеп оқушылары арасында құрылған ансамбль, одан кейін қыздар ансамблінің әншісі болдым. Мектеп бітірген соң, Аманкелді ауданында мәдениет үйінде қызмет істедім. Содан кейін 1993 А. Байтұрсынов атындағы Қостанай мемлекеттік университеті музыка факультетіне түсіп, 1999 жылы жақсы аяқтадым.
Қашаннан бастап ән жаза бастадыңыз, бірінші шыққан әндеріңізге тоқталып кетсеңіз?
Алғашқы әнім 1996 жылы дүниеге келді. Ол анаға деген махаббатым, анаға деген сағынышым арқылы шыққан Ақылбек Шаяхметовтікі сөзіне жазылған «Анашым» әні еді. Ақылбек аға сол жылдары Қостанай облысы әкімдігі мәдениет басқармасының орынбасары болып жұмыс істеген. Ақылбек ағаның кабинетіне кіріп, «Күнім сен анашым, Айым сен анашым»,-деген оймен келтіру керек деп ұсыныс білдірдім. Еш қарсылық көрсетпей қуана қабыл алды. Міне, сол жылдары шаң баспай, әннің әуенінен композиция саласындағы ұстазым Қалибек Деріпсалдин ақ жол тілеп, кейінгі әндерді де тексеру - бақылау сатылардан өткізіп талқыға түсіріп жұмыс жасап келеді.
Қазіргі жаңа шығып жатқан әндерге көңіліңіз тола ма?
Қазіргі шырқалып, шығып жүрген кейбір андердін, яғни сөзі мен сазында мағынасы жоқ , үйлесімі келмейтін әндерге көңілім толмайды.
Облыстық халық шығармашылық орталығы жанынан құрылған композиторлар көркемдік кеңесінде қандай жұмыстар жоспарланған?
Қостанай облыстық халық шығармашылық орталығының жанынан құрылған композиторлар көркемдік кеңесінде көптеген атқарылатын жоспарлар бар. Атап айтар болсақ, сәуір айында композиторлардың облыстық семинарлары өтеді, сонымен қатар ән байқаулары жоспарда тұр. Осындай ауқымды іс - шаралар, жұмыстар атқарылмақ.
Олай болса Сізге алғыс айта отырып, сәттілік тілейміз! Жаңа туындыларыңызбен қуанта беріңіз!
