Қостанай ауданына қарасты Айсары ауылында «Шабыт» мәдени-демалыс орталығы жұмыс істеп, тұрғындардың басын қосатын, ұлттық өнер мен шығармашылықты дамытуға арналған маңызды мәдени орынға айналып келеді
Былтыр күрделі жөндеуден өткен ғимараттың негізінде «Шабыт» мәдени-демалыс орталығы салтанатты түрде ашылған болатын. Жалпы аумағы 560 шаршы метрді құрайтын орталықта 80 орындық көрермен залы бар. Жақында орталықтың тыныс-тіршілігімен танысу мақсатында облыстық халық шығармашылығы орталығының басшысы Дәмер Қалқаев пен халық шығармашылығы бөлімінің әдіскері Гүлнұр Есенгазина Айсары ауылына арнайы барып, мәдениет ошағының жұмысымен танысып, бағыт-бағдар берді.
Бүгінде «Шабыт» орталығында тұрғындардың бос уақытын тиімді ұйымдастыруға, шығармашылық қабілеттерін дамытуға және ұрпақтар сабақтастығын нығайтуға барлық жағдай жасалған. Мұнда хореография кабинеті, домбыра және вокал студиялары, мәдени іс-шараларға арналған акт залы, кітапхана мен салауатты өмір салтын ұстануға мүмкіндік беретін спорт залы жұмыс істейді. Сонымен қатар орталық музыкалық аспаптармен және караоке жүйесімен жабдықталған. Орталықтағы ерекше орындардың бірі – коворкинг кеңістігі. Бұл алаң аға буын өкілдерінің шығармашылық әлеуетін ашуға, жаңа дағдыларды меңгеруге, өзара тәжірибе алмасып, мазмұнды уақыт өткізуіне мүмкіндік береді.
Қазіргі таңда орталықта ұлттық өнер мен халық шығармашылығын насихаттауға бағытталған 6 клубтық бірлестік жұмыс істейді. Оларға барлығы 46 адам қатысады. Атап айтқанда, ересектерге арналған 3 клубтық бірлестікте 16 адам өнер көрсетеді. Олардың қатарында «Ақжелкен» вокалды-аспаптық ансамблі, Жұмағановтар отбасылық ансамблі және «Дәстүр мұрасы» клубы бар. Ал балаларға арналған 3 үйірмеде отызға жуық өнерпаз қатысады. Шығармашылық ұжымдар балалардың өнерге қызығушылығын арттырып, ұлттық мәдениетке деген құрметін қалыптастырады.
Мәдениет ошағының 2026 жылға арналған қаржыландыру көлемі 5 млн 727,5 мың теңгені құрайды. Орталықтың ұйымдастырушысы – Гүлмира Әлжанова. Ауылдағы осындай мәдени ошақтар елді мекеннің рухани дамуына серпін беріп, өнерлі ұрпақтың қалыптасуына жол ашады.
