Қостанай облысының 90 жылдығына арналған XXXVIII облыстық «Өнеріміз саған, Қазақстан!» халық шығармашылығы фестиваль-байқауының гала-концертінде ерекше әсерлі сәттердің бірі – Қазақстан Республикасының еңбек сіңірген қайраткері, Қостанай облыстық филармониясының солисі Гүлбану Абдулинаның «Құрмет» орденімен марапатталуы болды

Жоғары мемлекеттік награда өнер иесінің ұлттық мәдениет пен өнерді дамыту жолындағы көп жылғы қажырлы еңбегіне, мәдениет саласына сіңірген өлшеусіз үлесіне көрсетілген зор құрметтің айқын көрінісі.

Гүлбану Абдулина – өнерге саналы ғұмырын арнаған талантты әнші, кәсіби шеберлігімен ғана емес, жас өнерпаздарды қолдауға қосқан үлесімен де кеңінен танылған тұлға. Ол көп жылдан бері халықаралық «Алтын микрофон» вокалистер байқауының қазылар алқасына жетекшілік етіп, жас дарындардың қанат жаюына, вокал өнерінің өркендеуіне елеулі үлес қосып келеді. Биыл өнер иесі мерейтойын және шығармашылық жолының 35 жылдығын атап өтуде.

Облыстық халық шығармашылығы және кинобейнеқор орталығының ұжымы Гүлбану Абдулинаны жоғары мемлекеттік марапат – «Құрмет» орденімен шын жүректен құттықтайды.

Зор денсаулық, отбасына амандық, шығармашылық шабыт, жаңа жетістіктер мен жарқын жобалар, көрерменнің ыстық ықыласы мен толайым табыс тілейміз. Өнердегі өнегелі жолыңыз жас буынға әрдайым үлгі болып, ұлттық мәдениетіміздің өркендеуіне қызмет ете берсін!