Кейде шынайы дүние ойламаған жерде дүниеге келіп жатады. Осындай ерекше оқиға Алтынсарин ауданында орын алып, жаңа әннің дүниеге келуіне себеп болды.
Аудан өнерпаздары облыстық «Өнеріміз саған, Қазақстан!» өнер байқауының іріктеу кезеңіне қызу дайындалып жатқан болатын. Байқау бағдарламасының көркемдік деңгейін арттыру мақсатында ауданға жас режиссер Марғұлан Әбдібек арнайы шақыртылады.
Режиссер өнер ұжымымен бірге бағдарламаны жан-жақты саралап, әрбір қойылымды мұқият пысықтайды. Алайда дайындық барысында финалдық бөлімге көрерменнің жүрегіне жол табатын, байқаудың мазмұнын айшықтай түсетін жаңа әннің қажеттілігі байқалады.
Осы сәтте Марғұлан Алтынсарин аудандық мәдениет үйінің музыкалық жетекшісі, сазгер Серікболсын Әбікеновке финалға арнайы жаңа ән жазуды ұсынады. Бұл ұсыныс үлкен жауапкершілік жүктейтіні белгілі ғой.
Сол түні Серікболсын шабытпен жұмысқа кірісіп, таң атқанша әннің сөзі мен әуенін қатар жазып шығады. Бір түнде дүниеге келген туынды байқауыдың идеясына толық сай келіп, елге деген сүйіспеншілік пен өнерге деген құрметті әсерлі әуен арқылы жеткізеді.
Жаңа ән облыстық «Өнеріміз саған, Қазақстан!»
байқауының финалдық бөлімінде алғаш рет орындалып, көрерменнің ыстық ықыласына бөленеді. Бір түнде туған шығарма аудан өнерпаздарының өнерін жаңа қырынан танытып, бағдарламаның көркемдік мазмұнын толықтыра түседі.
Бір қарағанда қарапайым ғана ұсыныстан басталған бұл оқиға кейін Алтынсарин ауданының мәдени өміріндегі жарқын шығармашылық жетістік ретінде есте қалды. Марғұлан Әбдібектің бастамасы мен Серікболсын Әбікеновтың шығармашылық ізденісі нәтижесінде туған ән – өнерге деген адалдықтың, кәсіби шеберліктің, шабыттың жарқын үлгісі.
Алтынсарин ауданында дүниеге келген ән – туған елге деген сүйіспеншіліктен туған. Ендеше сіздердің де назарларыңызға ұсынамыз.
