Қостанай өңіріне Құрманғазы атындағы Қазақ ұлттық халық аспаптар оркестрі арнайы гастрольдік сапармен келіп, үш күн бойы Жітіқара ауданы, Сарыкөл ауданы және Лисаков қаласында өнер көрсетті
Халық кәсіби өнерпаздардың жоғары деңгейдегі өнерін тамашалап, рухани әсерге бөленді. Өнер ұжымының Қостанай жеріне келмегеніне он жылға жуық уақыт болыпты.
Бұл игі бастама «Халық әуені» жобасы аясында жүзеге асырылуда. Жоба Қазақстан Республикасының Мәдениет және ақпарат министрлігі ұйымдастыруымен, Қазақстан Халық банкі акционерлік қоғамының демеушілігімен және жергілікті атқарушы органдардың қолдауымен өткізілді.
Жітіқара ауданында өнер ұжымын аудан әкімі Аслан Жаныспаев, мәдениет және тілдерді дамыту бөлімінің басшысы Жаңылдық Әлмұхамедова, аудандық мәдениет сарайының директоры Махабат Сәтмұханбетова қарсы алып, концерттің жоғары деңгейде өтуіне атсалысты.
Лисаков қаласында қала әкімі Абай Ибраев, қалалық мәдениет және тілдерді дамыту бөлімінің басшысы Нүрия Исмағұлова және қалалық мәдениет және спорт орталығының директоры Лейла Ержанова концерттің жоғары деңгейде ұйымдастырылуына үлкен үлес қосты.
Ал Сарыкөл ауданында аудан әкімі Марат Шымырбеков, аудандық мәдениет және тілдерді дамыту бөлімінің басшысы Нұрсұлтан Шүленов және аудандық мәдениет үйі басшысының міндетін атқарушы Абай Сейдахметов ұйымдастыру жұмыстарына белсене қатысып, өнер ұжымын құрметпен қарсы алды. Үш өңірде де сахналық техника, жарық, экран және дыбыс жүйелері толықтай талапқа сай әзірленіп, көрерменге сапалы рухани кеш сыйланды. Өңір басшылары концерттерге өздері қатысып, өнер ұжымына ерекше құрмет көрсетті.
Құрманғазы оркестрінің гастрольдік сапарын оркестр директорының орынбасары Алтынбек Ахметов бастап келді. Кештің көркін Қазақстанның еңбек сіңірген қайраткері, «Парасат» орденінің иегері, белгілі әнші Жеңіс Ысқақова аша түсті. Белгілі өнер иесінің орындауындағы әндер зал көрермендерінің зор қошеметіне ие болды. Осындай ұлттық өнерді насихаттап жүрген шығармашылық ұжымға және оркестр мүшелеріне көрермен қауым атынан зор ризашылық пен шынайы алғысымызды білдіреміз.
