Тобыл қаласындағы Алтын дән мәдениет үйі сахнасында Мұрат Нағашыбайтың «Әзіл men ән» атты шығармашылық кешінің қорытынды концерті өтті

Өнер жолында жүргеніне 20 жыл толуына орай ұйымдастырылған бұл кеш – мерейтойлық гастрольдік сапардың түйіні болды. Осыған дейін өңірдің бірнеше қала, аудандарын аралап, көрерменге думанды бағдарлама ұсынған өнер иесі шығармашылық белесінің маңызды кезеңін Тобыл төрінде қорытындылады.

Кеш барысында өнерпаздың сахнадағы жүріп өткен жолы, шығармашылық жетістіктері кеңінен таныстырылып, әсерлі бейнематериалдар ұсынылды. Одан әрі кеш ән мен әзіл астасқан шынайы өнер мерекесіне ұласты.

Ән мен әзілді шебер ұштастыра білетін өнерпаздың «Қазақтың амандасуы», «Телефонның кесірі», «Жұп-жұппен» атты монологтары көрерменнің ыстық ықыласына бөленіп, залды күлкіге қарық қылды. Күнделікті өмірден алынған шынайы образдар мен астарлы әзіл кеш мазмұнын тереңдете түсті.

Кеш қонақтары да сахна сәнін кіргізді. Ариман Азамат, Тасқын–Жұлдыз дуэті, Қанат–Әсем Ражановтар мен Асхат–Дидар Шыңғысовтардың қосыла шырқаған әндері көрермендердің зор қошеметіне ие болды.

Кештің шарықтау шегінде Мұрат Нағашыбай «Анаға тілек», «Тойға тарту», «Көрерменім» әндерін орындап, жиылған қауымға жүрекжарды алғысын білдірді. Жоғары деңгейде ұйымдастырылған концерт мазмұнды да әсерлі мәдени шара ретінде көрермен жадында қалары сөзсіз.