Қостанай қаласында Тобыл-Торғай өңіріне кеңінен танымал, әні мен сазы ел жүрегінен орын алған көрнекті әнші-композитор, Қазақстан Республикасының еңбек сіңірген мәдениет қызметкері, Қазақстан композиторлар одағының мүшесі, Қостанай облысы Аманкелді ауданы мен Қостанай қаласының құрметті азаматы Қалибек Деріпсалдинді еске алуға арналған «Сағыныш сазы» атты тағылымды кеш өтті.
Кеш барысында Қалибек Деріпсалдиннің өмір жолы мен шығармашылығы жайлы жылы естеліктер айтылып, композитордың жүрекке жететін, сағынышқа толы әндері мен күйлері орындалды. Оның туған өлкеге арнаған әндері халық жадында сақталып, бүгінге дейін орындалып келеді.
Еске алу кешінде «Мирас» ұлт аспаптар ансамблінің сүйемелдеуімен Қалибек ағаның елге кең тараған туындылары шырқалды. Ансамбль – сазгердің өзі іргесін қалаған өнер ұжымы, бүгінде оның шәкірттері мен ізбасарлары бұл дәстүрді лайықты жалғастырып келеді.
Сахна төрінде облыс пен республикаға танымал өнерпаздар – Азамат Мұқатов, Бөтагөз Дүбірбаева, Талғат Молдағалиев, Қанат Ражанов, Нұриден Қабыкен, Фариза Жоламанова, Асхат Шыңғысов, Арыстан Құрманов, Нұрболат Қадыров, Нұрболат Арзамасұлы, Анар Құмарова және басқа да белгілі орындаушылар өнер көрсетті. Сонымен қатар Қалибек Деріпсалдиннің ұлы, өнердегі ізбасары Жарқынбек Деріпсалдин әке аманатын арқалаған туындыларды орындады.
Облыстық мәдениет басқармасы
басшысының орынбасары
С.Д.Жүсіпов сөз сөйлеп, жылы естелігімен бөлісті. Сонымен қатар кеш қонақтары қатарында мәдениет саласының өкілдері, қоғам қайраткерлері, ақын-жазушылар мен сазгердің замандастары болды. Олар Қалибек ағамыздың адами болмысы, өнерге сіңірген еңбегі жайлы ой бөлісті.
Кеш соңында Қалибек Деріпсалдиннің ұлы Ербол Қалибекұлы сөз сөйлеп, әке рухына көрсетілген құрмет үшін жиналған жұртшылыққа алғысын білдірді.
Облыстық мәдениет басқармасының ұйымдастыруымен өткен «Сағыныш сазы» еске алу кеші ел жүрегінде мәңгі сақталған сазгерге деген халықтың шынайы сағынышының көрінісі болды.
