Торғай даласында жанды баурап, жүрек тебірентер әндер мен күйлерді тудырған талантты жастардың көш басын бастап келе жатқан әнші-композитор, Қазақстан Республикасының еңбек сіңірген мәдениет қызметкері Қалибек Деріпсалдин 1953 жылы 10 қаңтарда Аманкелді ауданы, Батпаққара ауылында дүниеге келген. 1970 жылы Аманкелді орта мектебін бітіріп, 1973 жылы Жамбыл атындағы мәдени-ағарту училищесін қызыл дипломмен тәмәмдаған.
Ол музыкант ретіндегі алғашқы өнер жолын Жамбыл облыстық филармониясының «Алатау» эстрада ансамблінен бастайды. Торғай түлегі Қалибек Деріпсалдыұлы 1973 жылы туған жеріне оралып, Арқалық қаласындағы Ш. Уәлиханов атындағы орта мектепте ән сабағының оқытушысы болып орналасады. Сонымен қатар, ұстаздықтан қол үзбей «Шертер» фольклорлық-этнографиялық ансамбілінің құрамында қызмет істеген. Мектепте «Балауса» ән және би ансамблін ұйымдастырып, Арқалық қалалық мәдениет бөлімінің жанынан «Торғай толғауы» атты халық аспаптар ансамбліне жетекшілік еткен. Торғай жұртшылығы арасында өзінің өнердегі табыстарымен көзге түсіп жүрген Қалибек Деріпсалдин 1980 жылы Қима аудандық мәдениет бөлімінің меңгерушілігіне тағайындалады.
Жаңадан құрылған ауданда қазақ ән өнерін насихаттауда көптеген игі шараларды жүзеге асырады. Қысқа мерзім ішінде «Гүлдәурен» халық аспаптар ансамблі ұйымдастырылады. Таланттар тоғысқан өнер ұжымының бай репертуары олардың облыстық фестивалда лауреат атануына жол ашады. Әнші-композитор Қалибек Деріпсалдин 1982 жылдан бастап өзі туып-өскен жері Батпаққараға қоныс аударады. Ол Амангелді аудандық мәдениет үйінің көркемдік жетекшісі бола жүріп, «Торғай толқыны» атты халық аспаптар ансамблін ұйымдастырған. Өнер ұжымына талантты жастар мен мектеп оқушылары тартылады. Ансамбльдің репертуары Торғай өңіріне белгілі сазгерлердің, күйшілердің және әншілердің шығармаларынан құрылады. Бұл Қалибек Деріпсалдиннің шығармашылық соны жетістігі болатын. Соның нәтижесінде, өнер ұжымы облыс және республика көлеміне кеңінен танымал халық аспаптар ансамбліне айналды.
1984 жылы Алматыда Кенен Әзірбаевтың 100 жылдығына арналған республикалық қобызшылар сайысында 19 қатысушының арасында бірінші орынды Қалибек иемденеді. Әнші-композитор 1988 жылы Қазақстан композиторларының VІІІ съезіне делегат болып сайланады. Бір жылдан кейін Алматы қаласында Ш. Қалдаяқов атындағы концерт залында тұңғыш рет жеке шығармашылық кешін өткізеді.
Жалпы алғанда Қалибек Деріпсалдин 80-нен астам әндер мен алты күйдің авторы. Ол «Көктем қыздар» (1993), «Домбыра сазы-Ерке құсым» (1993), «Айлы түнде» (2003) және «Торғай әуендері» (2007) атты әндер жинағын жарыққа шығарды. Белгілі композитордың әндерін Қазақстанның танымал әншілері Н.Нүсіпжанов, Б. Жүсіпбеков, Ж. Махамбетов, Ұ. Айнақұлов, Ғ. Жүмекенова, Г.Хамзина және тағы басқалар орындайды. Оның шығармалары «Нұр-Мұқасан», «Мұзарт» Досымжан Таңатаров, Еркебұлан Сәрсенбеков, Есет Сәдуақасовтар ұнатып, жұртшылық назарына ұсынып жүр.
Оның сазгерлік қабілетінің шыңдалуына Алматыдағы тәлімгері Әсет Бейсеуовты мысалға алмағанның өзінде, жергілікті сазгерлер Болат Хамзин, Қайыржан Мақанов, Айтбай Мұздахановтардың ықпалы ерекше.
1991 жылы ҚР Президентінің Жарлығымен "Қазақ КСР еңбек сіңірген мәдениет қызметкері" құрметті атағы берілді, КСРО Композиторлар одағының дипломдарымен және Қазақстан композиторларының дипломымен екі рет марапатталды.
1997 жылдан Қостанай қалалық мәдениет бөлімінің "Мирас" ансамблінің құрамында жұмыс істеді. Көптеген әндер жинағын шығарды. Халық музыкасының қыр-сырын білетін талантты композитор ретінде ол бірде-бір тыңдаушыны бей-жай қалдырмай, адами құндылықтардың кең дүниетанымын әндерге енгізді. Оның дауысы біздің облыста және елде ғана емес, одан тыс жерлерде де тыңдаушылардың жүрегін жаулап алды. Қалибек Дерипсалин Қазақстанның халық шығармашылығының дамуына баға жетпес үлес қосты. Композитордың әндерін орындаушылардың республикалық “Көктем-қыздар” атты ән байқауы бірнеше жыл қатарынан үзбей өтіп келеді.
Батпаққара тумасы, қазақ музыка өнерінің көрнекті қайраткерлерінің бірі, әнші-композитор Қалибек Деріпсалдиннің салған ізі мәңгі жасамақ.
