Әдебиет әлемінде өзіндік қолтаңбасын қалдырған қаламы қарымды қаламгер, ұлт мұрасын ұлықтаған зиялы тұлға, талай жүрекке жылу сыйлап, қазақ өнері мен мәдениетінің дамуына сүбелі үлес қосқан, ақын Серікбай Оспановтың Қостанай төрінде «Тобыл ағады» 80 жас мерейтойлық кеші өтті
Облыс әкімнің қолдауымен мерейтойдың басы ақынның жастық шағы өткен Алматы қаласында «Сағындым Алматымды» деген атпен дүркіреп өткен болатын.
Туған күнінде облыс әкімі Құмар Ақсақалов арнайы құттықтап, ақынның мәдениет пен әдебиет саласындағы жетістіктерін жоғары бағалап, ат мінгізіп, шапан жапқан еді. Енді осының жалғасы туған өлкесі – Тобыл-Торғай өңірінде де өтіп жатыр.
Кешті облыс әкімнің орынбасары Бақытжан Нарымбетов құттықтау сөзімен ашты. Сонымен қатар филология ғылымдарының докторы Нұрдәулет Ақыш Алматыдан арнайы келіп, жүрек жарды лебізін жеткізді. ҚР Жазушылар Одағының Қостанай облысы бойынша филиалының төрағасы Жанұзақ Аязбекұлы мен «Қостанай таңы» газетінің редакторы Кенжеш Аманова, профессор Аманжол Күзембайұлы кеш иесін құттықтай келді. Серікбай ағайға құрмет көрсетіліп, иығына шапан жабылып, естелік сыйлықтар табысталды.
Серікбай ағай 300-ге жуық әннің мәтінінің авторы десек, оның ішінде 35 әнін өзі жазған. Кеш барысында ағайдың «Тобыл ағады», «Сағындым Алматымды», «Ауылды аңсау», «Айлы түнде» әндері шырқалды.
Кеш иесін мерейлі жасымен құттықтаймыз, жазарыңыз таусылмасын, жарыңыз Гүлзада апаймен бірге жасай беріңіз.
