Қалибек Деріпсалдин ағамыздың дүниеден озғанына да жыл толыпты-ау...
Осы бір қимас жанның жарқын бейнесі, жүрекке жылы үні, өмірге деген шынайылығы мен адалдығы ел жадынан ешқашан өшпек емес.
ҚР Мәдениет саласының еңбек сіңірген қызметкері, ҚР халық білімінің үздігі, Қостанай қаласы мен Аманкелді ауданының құрметті азаматы Қалибек Деріпсалдин – өз ғұмырын өнер мен білімге арнаған, артына мол рухани мұра қалдырған көрнекті тұлға.
Ол – тыңдарман жүрегінен терең орын алған сазгер.
80-нен астам әні мен бірнеше күйі ел ішінде кең таралып, бүгінгі күнге дейін шырқалып келеді. Оның «Қимадан ба едің, қалқам-ай», «Сарыторғайым», «Туған жерім – Қостанай», «Амангелді аруы» сынды әндері – халқымыздың сыршыл болмысы мен туған жерге деген перзенттік сезімін бейнелейтін асыл мұрасы бола бермек.
Қалибек аға – тек талантты сазгер емес, сонымен қатар ұлағатты ұстаз, бағыт берген шебер жетекші еді. Ол өз шығармашылығында ұлттық болмыс пен замана үнін шебер үйлестіріп, қазақ музыкасын байыта түсті.
Ағайдың әндері сезім қылын шертіп, тыңдарман жүрегіне жол тауып келеді.
Ағайын-туысы мен шәкірттері, замандастары, ел-жұрты Қалибек Деріпсалдинді әрдайым сағынышпен еске алады.
Жатқан жеріңіз жайлы, мәңгілік мекеніңіз нұрлы болсын.
Сіз салған өнер жолы – мәңгілік!
Ағайдың жүрек үнімен шырқалған, тыңдаушының жанын тербететін сырлы туынды – «Мойныңды бұршы, асқағым» әнін қабыл алыңыздар.
