Шілденің алғашқы жексенбісі – қазақ халқының рухани болмысын айшықтайтын ерекше күн. Ол — Ұлттық домбыра күні. Қазақтың бар болмысын бойына сіңірген қасиетті қара домбыра – елдің еңсесін тіктеп, ұлт рухын асқақтататын киелі аспап.

«Нағыз қазақ – қазақ емес, нағыз қазақ – домбыра» деген қанатты сөзден-ақ домбыраның халқымыз үшін қандай қадірлі, киелі екенін түсінуге болады. Бұл күн – ұлы мұраны ұлықтап, бабалар аманатын жаңғыртатын күн.

Домбыра десе, халқымыздың шертпе мен төкпе күйіндегі сан ғасырлық тарихы, өмірдің әр сәтін күйге бөлеген өнер тарландары ойға оралады. Солардың қатарында есімі елге танымал Қайрат Байбосыновтың, Айгүл Қосанованың, Айгүл Үлкенбаеваның есімдері ерекше аталады. Өнерлері талай жүрекке жетіп, сананы серпілтті. Домбыраны тек аспап емес, тұтас философия, ұлттық код деп таныта білген жандар.

Тобыл-Торғай өңірі де киелі домбыра мен дәстүрлі өнерден кенде емес. Дәстүрлі өнердің дамуына зор үлес қосқан дара дарын Айтпай Мұздаханов, Анар Мұздаханова, Бораш Әбенов, Әсия, Әлпия апаларымыз – аймақтың мәдени өмірінде өзіндік орны бар талант иелері.

Ұлттық домбыра күні дала үнін жаңғыртып, келер ұрпаққа аманаттау күні. Бұл күн – өнер иелерінің еңбегін ескеріп, олардың жолын жалғастыратын буынды тәрбиелеуге жол ашатын мереке.

Бүгінде еліміздің әр өңірінде дәстүрлі ән мен күйге деген қызығушылық артып келеді. Бұл – қуанарлық құбылыс. Өйткені, ұлттық болмыс домбырамен бірге жасайды.

Ұлттық домбыра күні – өткенді еске алып, келешекке көз тастайтын, рухани тамырдан нәр алатын ерекше күн.

Күмбірле, қоңыр домбыра!