Мемлекет басшысының шешімімен 2018 жылдан бері шілденің алғашқы жексенбісі қазақтың төл аспабының күні болып тойланып келеді.

Жағымды жаңалық жүрегімізге жылы ұялап, жанымызды жадыратты. Бұл мерекенің ұлттық руханиятымызға қосар үлесі салмақты да, сүбелі болмақ.
 

Бұл мерекені Амангелді ауданының халқы асқақ сезіммен, сән-салтанатпен атап өткені елге аян. Ауданда тұңғыш рет 1000 домбыраның қатысуымен күй ойналды.
 

2019 жылы сол кездегі аудан әкімі Әмірхан Асанов әрбір ауылдық округ әкімдеріне, мекеме, кәсіпорын басшыларына әзірлікті бастауға, домбырашыларды ұлттық аспаптармен қамтуды алға қойды.
 

Домбырашылармен дайындық жұмыстарын Астана қаласында тұратын жерлесіміз, кәсіби музыкант, Амангелді ауданының құрметті азаматы, белгілі өнерпаз Сапарғали Ахметжанов пен музыка мектебінің директоры Кенжеболат Ахметов домбырашылармен жиі кездесіп, олардың орындау нәтижелерін бақылап, жыл бойы дайындық жүргізген болатын.
 

Жыл бойғы еңбектің жемісіне аудан халқы 2019 жылдың 4 мамыр күні ауданымызда өткен аймақтық Қызғалдақтар фестивалінде 500 домбырашының өнеріне куә болды.

Аудан әкімінің бастамасымен халықтан құралған 1000 домбырашы Құрманғазының «Балбырауын», «Келіншек» күйлерін орындап, көрерменін тәнті етті. 1000 домбырашының күй тартуы республика көлемінде алғаш рет қолға алынып отырған іс-шара болды. Бұл іс-шараға «еңбектеген баладан, еңкейген қарияға» дейін қатысып, асқан ұйымшылдық көрсеткен еді.
 

Ауданымызда өткен үлкен тойға сыртта жүрген өнерпаз жерлестеріміз келіп, 1000 домбырашының қатарына қосылып, күй тартты.
 

Олар өнер майталмандары кәсіби музыканттар Анар Мұздаханова, Шолпан Қорғанбекова, Гүлшат Қажығалиева, Ақжанай Қалиева, Алма Адаханова және т.б. жерлестіріміз ұлттық мерекеміздің абыройын асқақтата білді.
 

2019 жылы Ұлттық домбыра күнінде 1000 домбырашы бір сәтте 2 күй орындап, еңбек еленіп, 2020 жылы ауданымызға сүйіншілеп жақсы хабар келді.
 

Бұл қуаныш «Былтырғы ауданымызда өткен Ұлттық Домбыра күніне ұйымдастырылған 1000 адамның орындауында «Балбырауын» және «Келіншек» күйлері Халықаралық Гиннестің рекордтар кітабына кірді» - деген ақжолтай жаңалық еді. Оның басты себебі, 17 мың ғана халқы бар ауданнан 1000 домбырашының шығуы болды. Бұл жаңалыққа аудан халқының қуанышында шек болған жоқ. Мәдениет саласының жетістігіне сыртта жүрген барлық жерлестеріміз әлеуметтік желі арқылы құттықтап, жылы-жылы лебіздерін айтып, қуанып жатты. Гинестің рекордтар кітабына кіру аудан басшысының бастамасын қолдаған, аудан халқының ауызбіршілігі мен еңбегі деп айтуға әбден болады.
 

Ұлттық Домбыра күнін ұлықтау дәстүрлі түрде жалғасын тауып келеді.

2020 жылы 1000 домбырашы 5 күй тарту жоспарланып, дайындық қызу жүріп бастағанда еліміздегі қауіпті індетке қарсы жарияланған төтенше жағдайға байланысты кейінге шегерілді.
 

Жыл бойы аудан басшысының бастамасымен «Әр үйде – бір домбыра» акциясы ұйымдастырылып, ауданымыздың кәсіпкерлері мен басшылары қазақтың қара домбырасымен қамтамасыз етті. Бұл акция ауданда дәстүрлі ұйымдастырылып келеді.
 

Өнерлі халықтың мәдени құрылымы биік, тамыры терең. Өйткені, күй – қазақ халқының рухани қаынасы, сарқылмас баға жетпес байлығы.

Бүгінде қасиетті қара домбыраның күмбірін әлем мойындап, ұлттық брендімізге айналды.