View this post on Instagram

 

 

 

 

 

 

 

 

 

 

 

A post shared by Culture Qostanai (@culture_qostanai)

 

Маусым айының соңында Қамысты ауданында бұрын-соңды болмаған ерекше бастама – «Бабалар ізімен» атты тың жоба өз жорығын бастаған болатын. Бұл рухани экспедицияның басты мақсаты – халқымыздың салт-дәстүрін, сал-серілік өнерін, ұлттық құндылықтарды насихаттау және жастарға үлгі болу.

Жоба аясында өнерпаздар бес атпен жолға шығып, Қамыстыдан бастап өңірдің бірнеше аудан-қалаларын аралап өтіп, бүгін діттеген жер — Қостанай ауданы, Тобыл қаласына аман-есен жетті.

 

Қатысушылардың қатарында ақын, термеші, әнші, жалпы шығармашыл азаматтар бар. Олар жол бойындағы киелі орындарға, зираттарға тоқтап, бабалар рухына тағзым етіп, құран бағыштап, алдын ала жоспарланған аудан, қалаларға соғып, жергілікті халықпен жүздесіп, рухани кештер өткізіп, ұлттық өнерді насихаттады.

 

Бұл бастама – Домбыра күнімен де, ауданның 70 жылдығымен де үйлесіп отыр. Егер биылғы сапар сәтті өтсе, келер жылы Арқалық, Аманкелді, Жанкелдин аудандарына жол тартпақпыз, – дейді жоба жетекшісі, Қамысты аудандық мәдениет үйінің директоры Еркебұлан Кәрімұлы.

 

30 маусым күні Қамыстыдан шыққан керуен алдымен Денисов ауданына жетіп, одан кейін Лисаков қаласына аялдап, Б.Майлин ауданына, Рудныйға жетті. Ал жобаның соңғы нүктесі – Қостанай ауданы, Тобыл қаласына сал-серілер аман-есен жетті.

 

Жалпы жоба аясында өнерпаздар жол бойындағы аудан, қаларды аралап, дала төсін салт атпен жүріп өтіп, қазақ даласының сұлулығын да, өнері мен дарқан көңілін, салт-дәстүрін паш етті. Бұл бұрын соңды болмаған ерекше бастама болды.