Ақтауда ел есінде қалатын елеулі оқиға – Түркі әлемінің мәдени астанасы атанған Ақтау 2025 халықаралық іс-шарасының ашылу салтанаты дүркіреп өтті. Бұл күн – тек Маңғыстау жұрты үшін ғана емес, күллі түркі дүниесі үшін үлкен мереке болды.
Салтанатты кеш ҚР Мәдениет және ақпарат министрі Аида Балаева ханымның құттықтау сөзімен басталды. Ол Мемлекет басшысы Қасым-Жомарт Тоқаевтың ыстық сәлемін жеткізіп, бұл бастаманың маңызын айрықша атап өтті. Сондай-ақ, Маңғыстау облысының әкімі мен Халықаралық Түрксой ұйымының бас хатшысы Сұлтан Раев мырза да жұртшылықты мерейлі мейраммен құттықтап, түркі жұртының мәдени бірлігінің символына айналған бұл бастаманың болашағы жарқын екенін жеткізді.
Салтанатты шара одан әрі Ақтау өңірінің бай тарихын бейнелеген театрландырылған көрініспен жалғасты. Қойылым мазмұн тереңдігімен, көркемдік шешімімен көз сүйсіндіріп, көрерменге рухани әсер сыйлады. Аймақтың дарынды өнерпаздары барын салып, жұртты тәнті етті. Әсіресе, түнгі аспанды жарыққа бөлеген дрон шоуы көрермендердің ыстық ықыласына бөленіп, ерекше әсер қалдырды.
Кештің сәнін әйгілі өнер иелері келтірді: Роза Зергерлі, Димаш Құдайберген, California тобы мен Каспий ансамблі сахнаны қыздырып, халықты шаттыққа бөледі. Әр ұлттың өнерпаздары өз мәдени мұрасын паш етіп, түркі дүниесінің алуан түрлі, бай болмысын көрсетті. Кеш соңында аспанды нұрға бөлеген салют мерекенің шырайын аша түсті.
Қазақстанның түкпір-түкпірінен арнайы келген делегациялар мен құрметті қонақтар бұл тарихи шараға қолдау білдіріп, рухани ортақтықтың үлгісін көрсетті. Түркі тілдес елдерден жиналған мәртебелі меймандар Ақтаудың төрінде бас қосты. Бұл күн шын мәнінде халықтар достығының, мәдениеттер үндестігінің жарқын көрінісіне айналды.
Айта кетерлік жайт – алаңға 100 000-нан астам адам жиналып, бірліктің биік үлгісін танытты. Маңғыстау жұртының ауызбіршілігі мен ұйымшылдығы елге үлгі болды. Іс-шара аяқталған соң, жиналған халық алаңды өз еріктерімен тазалап, нағыз мәдениетті қоғамның үлгісін көрсетті. Бұл – халықтың өрелі санасының, жоғары мәдениетінің айғағы.
Сондай-ақ, бұл мерекеге Қостанай облысының мәдениет саласының жетекшілері де арнайы атбасын бұрып, рухани бастамаға қолдау білдіріп, өнердің ортақ қуанышына ортақтасып қайтты. Олар елдің мәдени байланысын нығайту жолындағы осындай бастамаларға әрдайым үн қосуға дайын екендерін көрсетті.
