Осыдан бір жыл бұрын Әулиекөл ауданында «Шабыт» театры құрылған еді. Енді дамып келе жатқан ұжым өздерінің алғашқы мерейтойын жаңа спектакльдің премьерасымен атап өтті. Олар көрермен назарына «Садағаң кетейін...» драмасын ұсынды
Қойылым отбасы құндылығы мен жақындарымызға деген жауапкершіліктің маңыздылығына арналған. Театр сахнасында лудомания, нашақорлық және отбасылық қатынастардың бұзылуы сияқты мәселелер көтерілді. Кейіпкерлердің тағдырлары, олардың қателіктері трагедиялық салдарға алып келетін оқиға көпшілікті бейжай қалдырмады. Отбасының ыдырауы, өзара түсіністік пен құрметтің жоғалуы, қарт ата-аналардың қайғылы қазасы – осының бәрі жауапсыздықтың салдары.
Спектакльді дайындауға әртүрлі мамандықтағы және түрлі жастағы адамдардан құралған ұжым еңбек етті. Мұғалімдер, дәрігерлер, мемлекеттік қызметкерлер және оқушылар – «Шабыт» театрында өнерге деген сүйіспеншілікпен және адалдықпен жұмыс істейді.
Қойылымды көрермендер жылы қабылдап, қошемет көрсетті.