Бұдан кейін қатысушы елдер делегацияларының дәстүрлі шеруі болды, онда Азия, Еуропа, Солтүстік және Оңтүстік Америка, Африка және Австралия өкілдері өздерінің мәдениеті мен спорттық дәстүрлерін көрсетті.

 

Қазақстан Президенті Қасым-Жомарт Тоқаев өз сөзінде бұл ойындардың маңыздылығын атап өтіп, барлық қатысушыларға, соның ішінде осы айтулы халықаралық шараға жиналған бауырлас мемлекет басшылары мен спортшыларға алғысын білдірді.

 

Ол көшпелілер өркениетінің адамзат тарихында тамыры тереңде жатқанын, әлемдік прогреске қосқан үлесі зор екеніне тоқталып өтті. Сол кездегі озық технологияларды меңгерген көшпелілердің ат спортының бірегей мәдениетін қалыптастырып, көрнекті өнер туындыларын жасағанын тілге тиек етті. Тоқаев сондай-ақ қазақ халқының тарихи жетістіктерін, соның ішінде қуатты мемлекеттер мен әсем қалаларды құрғанын атап өтті.

 

Мемлекет басшысы атап өткендей, Көшпенділер ойындары – болашақ ұрпақ үшін бірегей мұраны сақтауды мақсат ететін жоба. Ол осыдан он жыл бұрын алғаш рет осы ойындарды өткізген қырғыз ұйымдастырушыларына ризашылығын білдіріп, ойынды «Көшпенділер Олимпиадасы» деп атады.

Салтанатты шара барысында көшпенділер өркениетінің мәдениеті мен тарихына арналған театрландырылған көрініс көрсетіліп, адамзат баласын ортақ үйіміз – Жер ананы сақтауға үндеген бірнеше эпизодқа ұласты.

Сонымен қатар салтанатты жиында ұйымдастыру комитетінің төрағасы Роман Скляр мен Дүниежүзілік этникалық спорт конфедерациясының президенті Билал Ердоған сөз сөйледі.

 

Дүйсенбі күні ат бәйгесі, күрес, түрлі жекпе-жек, дәстүрлі садақ ату және басқа да спорт түрлерінен жарыстар басталады. Қазақстан құрамасының құрамында төрт қостанайлық спортшы бар: көкпар сайысында Абду Мейрамбек, Нұркен Омаров, Наурызбай Қалтаев; Алыш күресінде Әділет Жаңбыршы.