Ұлттық домбыра күніне дайындық қызу. Іс-шаралар тек қоғамдық орындар мен мәдени ошақтарда ғана емес, спорт клубтарында да жалғасып жатыр. Өткен демалыс күндері «Сұлтан» спорт клубында домбыраның үні шығып, күй ойналды. Спортты жанына серік еткен жастар өнерден де кенде емес екен. Қонаққа келген өнерпаздар әр жаттығу арасында күй ойнап, спортышалрдың делебсін қоздырып, күш берді. Қостанай облыстық кикбоксинг федерациясы осындай іс-шараның өтуіне мұрындық болды.
Кикбоксингетен Әлем чемпионы Нұралы Серіков Секен Тұрысбековтың «Көңіл толқынын» ойнаса, кикбоксингтен Әлем кубогі иегері Джохар Цечоев та қалыс қалмай, қолына домбыраны алып шертіп көрді. Музыка мектебінде білім алып, гитараның тілін білетін Джохар үшін домбыраны шерту қиынға соқпады.
Қазақстан Республикасының аға бапкері Әскер Макубаев пен халықаралық дәрежедегі спорт шебері бапкер Асқар Бермұхамбетов жастарға тілегін білдіріп, бұл күннің маңызына да тоқтала кетті. Ал Рудный қаласынан Берік Қозылов «Алтын домбыра» студиясында балаларды Ұлттық домбыра күніне дайындап жатыр. Бұл іс-шараға мәдениет саласында еңбек етіп жүрген әріптестер де келіп, спорт пен өнерді қатар алып жүруге болатынын көрсетті. Осылайша екі жақты тәжірибе алмасу болды десе де болады. Спортшыларды – өнерге, өнерпаздарды – спортқа шақырып, домбыраның қоңыр үнімен олардың бойына рух берді.
Спортшылар әлемдік додада қазақ елінің көк туын көкке көтерсе, өнерпаздар қазақтың қара домбырасының құдіретін арттырып, дәрежесін биіктете түсуде.
