Қостанай облысында "Бозторғай-2" телехикаясының түсірілімі басталып кетті. Осыған орай қаламызға "Хабар" медиа холдингінің басқарма төрағасы Берік Уәли, Қостанай облысы әкімдігінің мәдениет басқармасының басшысы Құралбек Атамұратов, «Бозторғай» телехикаясының бас режиссері Жалын Тілеубергенов, «Бақытты отбасы» кітабының авторы Қанат Естек бас қосып, журналистермен баспасөз мәслихатын өткізіп, журналистердің сұрақтарына жауап берді.
«Арнамыз соңғы жылдары қазақ сериалдарын көптеп көрермендерге ұсынып жатыр. Биыл алты туындыны көрерермендерге тарту еттік. Соның бірегейі – «Бозторғай» телесериалы. Бұл, білесіздер, осы Қостанай өңіріндегі жас жұбайлардың балалар үйінен он бірдей баланы асырып алған ерлікке пара-пар оқиғасы желісінде түсірілген маңдайалды туынды. Кейін көрермендерден осы жайлы сауалнама жиналды. Нәтижесінде сауалнама қатысқандардың тоқсан үш пайызы сериалдың жалғасын түсіруді қолдады. Бұл жолғы сериалдың ерекшелігі Қостанай жерінде түсірілуінде», - деп атап өтті «Хабар» телеарнасы директорлар кеңесінің төрағасы Берік Уәли.
Екінші маусымның түсірілім жұмыстары қызу қолға алынған. Оған жергілікті актерлар да тартылып жатыр. Оқиғаның қалай өрбігені қалың көрерменге жақсы таныс. Кинодан кейінгі келіп түскен хаттар легі де көп. Бұл отбасын Президенттің өзі де арнайы хат жолдап, құттықтаған еді. Сериал 15 бөлімнен тұрады.
«Мен осы отбасының отанасы Қарлығаның бауырымын. Төрт айлығымнан апамның қолында өстім. Апам мені жетектеп тұрмысқа шықты. Олардың отбасында екі ер бала дүниеге келді. Біз қыз болса екен дейтінбіз. Сөйтіп жүріп, балалар үйінен апам мен жездем үкіметтен еш көмек алмай-ақ, он баланы бірден алды. Осылайша балалар ер жетті. Осы балалардың ішіндегі Ермектің анасын тауып беремін деп сөз берген едім. Өкінішке қарай, анасын таба алмай, сол Ермектің өмірі туралы кітап жаздым. Кітап осылай дүниеге келді. Кейін киноға арқау болды. «Хабар» арнасына, облыс әкіміне, мәдениет басқармасына, барша қолдау білдірген азаматтарға алғысым шексіз», — дейді Қанат Естек.
«Жерлесіміз Садықовтардың өмір жолы туралы сериал түсірілгеніне қуаныштымыз. Фильмнің түсіріліміне қолдау көрсетіп, облыстық қазақ драма театрынан 15 актер басты рөлге, 40-тан астам актер эпизодқа қатысуда. Облыс әкімдігінен бастап қолдау білдіріп, локация таңдауда, реквизит табуда көмегіміз көп. Бұл отбасы Заречный ауылында тұрады. Асырап алған он бала Қостанай, Астана, Алматыда тұрып жатыр. Барлығы да отбасылы, өмірден өз орындарын тапқан», — деді облыстық мәдениет басқармасының басшысы Құралбек Атамұратов.
Қонақтар сериалдың түсірілім алаңында болып, дәстүр бойынша жаңа жобаға сәттілік тілеп, тарелка сындырды.
