#Repost @erlankalmakov • • • • • • "Сағындым Алматымды" әнін білмейтін қазақ кемде-кем.
Әйтсе де, жарты ғасырлық тарихы бар әннің сиқырлы сазына Алматыға деген бар қазақтың сағынышын сыйғызған керемет өлең жолдарын жазған ақынды біразы тани бермейді. Біз болсақ, жүрген жерімізде Серікбай Оспановты дәл осы ән арқылы таныстырудан жалыққан емеспіз. Дегенмен, кейде мұнымыз да қателік пе деп қаламыз. Себебі, Секеңнің қазаққа берген қазынасы бұдан әлдеқайда көп. Бірнеше кітапқа жүк болған өлеңдері қазақ әдебиетінің алтын қорынан лайықты орын алған. Оған қоса, Серікбай аға — ғылым жолында көз майын тауысқан көрнекті ғалым. Қазіргі уақытта ыбырайтану саласында ол кісіге жететін ешкім жоқ. Былтырғы жылы ахметтану саласына да қомақты үлесін қосып, бірегей зерттеулерін көпшілік назарына ұсынды. Ол кісінің он саусағынан өнер тамған шебер екенін де біреу білсе, біреу білмес. Қостанайдағы бірталай қазақтың үйінде Секеңнің қолынан шыққан бесік, домбыра, табақ сияқты ағаш бұйымдар тұр. Серікбай ағаның шығармашылығындағы тағы бір ерекше бөлігі — балаларға арнап жазған дүниелері. Өткен жылы "Ахмет ата" деген кітап шығарды. Бұл кітапта Ахмет Байтұрсынұлының өмірі мен шығармашылығы туралы баланың тілімен жазылған өлеңдер, әндер топтастырылған. Ал, жуырда баспадан тағы бір кітабы жарық көрді. Ол дүниесін маған әкімдіктегі бір кездесуден шығып келе жатып тарту етті. "Балаларға қолтаңбаңызды қойып беріңіз" деп қолқалап, иығымды тостым. Сол бір қайталанбас сәтті Жанұзақ Аязбеков ағам сырт еткізіп, суретке түсіріп алды. Ең қуаныштысы — "Адамгершілік әліппесі" деп аталатын кітап біздің үйдегі ең көп оқылатын кітапқа айналды. Әсіресе, балалар бір-біріне ішіндегі жұмбақтарын жасырып мәре-сәре боп отырады. Тіпті, компьютер, флешканы да жұмбақ етіп жасырыпты. Балаларға арнап жазылған тәрбиелік мәні зор өлеңдері қандай десеңізші?! Бүгін кеудесі алтын қазына Серікбай ағамның туған күні. Сексеннің сеңгірін бетке алған Секеңе ұзақ ғұмыр, зор денсаулық тілейміз! Ортамызды толтырып, аман-есен жүре беріңіз, жақсы аға!
