«Сәлем саған, туған ел» әні, орындаған: Алтынай Жорабаева, Ақнұр Жұматай

«Сәлем саған, туған ел» әні

Сөзі: Шөмішбай Сариевтікі, әні: Кеңес Дүйсекеевтікі.

Атақты композитор, Қазақстанның еңбек сіңірген өнер қайраткері Кеңес Дүйсекеев: «музыка- ұлттық рухтың тілі» деген екен. Бүгін сөзі мен әні жан тебірентер «Сәлем саған, туған ел» әнінің тарихына қысқаша шолу жасасақ.

Білімін музыкалық училищеде бастаған Кеңес Дүйсекеев 1974 жылы Алматы консерваториясын аяқтайды. Ал «Сәлем саған, туған ел» әнін 1976 жылы жазады. Әйгілі әннің алғашқы орындаушысы - Роза Рымбаева. Шығарма қазақ өнерпаздары өзге елдерге гастрольдік сапарларға барғанда ұлтты таныстыру және сәлем ретінде орындау мақсатымен өмірге келеді. Роза Рымбаева көптеген мемлекетте концерттерін осы әнмен ашып жүрген.

1979 жылы Түркияның Ыстамбул қаласында өткен «Алтын микрофон» байқауына Роза Рымбаева қатысып, лауреат атанған еді. Фестивальда ол «Домбыра туралы балладаны» түрікше шырқап, артынша «Сәлем саған, туған ел» әнін қазақша айтады. Музыкасы да түріктікіне ұқсас әннің көңілді ырғағына елтіген түріктер орындарынан тұрып билеп кеткен екен.